بانكتەردىڭ قازىرگى ساياساتى - ەكونوميكانى دامىتۋ ەمەس، تۇتىنۋشىلىق نەسيە ارقىلى مول تابىس تابۋ
استانا. KAZINFORM - بانكتەردىڭ قازىرگى نەسيە ساياساتى - ەكونوميكانى دامىتۋ ەمەس، تۇتىنۋشىلىق نەسيە ارقىلى مول تابىس تابۋ. مۇنداي پىكىردى ەكونوميست باۋىرجان ىسقاقوۆ ايتتى.
«پرەزيدەنتتىڭ وسى جولعى جولداۋىندا بانكتەر تۋرالى جاڭا زاڭ ازىرلەۋدى تاپسىرۋى - وتە ورىندى باستاما. ويتكەنى، ءدال قازىرگى بانكتەردىڭ نەسيە ساياساتى، نەسيە قورجىنىنىڭ قۇرىلىمى ەكونوميكانى دامىتۋعا ەمەس، تۇتىنۋشىلىق نەسيەنى نەعۇرلىم كوپ بەرۋ ارقىلى تابىس تابۋعا باعىتتالعانىن اشىق ايتۋعا نەگىز بار. سول ءۇشىن جالپى الەمدىك تاجىريبەنى نەگىزگە الا وتىرىپ، بانكتەر تۋرالى ارناۋلى زاڭ قابىلدانۋى قاجەت. ەكونوميكاعا قانداي بانكتىك ءونىم تيىمدىلىك، تابىس اكەلسە، سونىڭ ءبارىن قولداۋىمىز كەرەك»، - دەيدى ەكونوميست.
وسى ورايدا ساراپشى قارجى جۇيەسىندە يسلامدىق قارجىلاندىرۋ دەگەن جاقسى باعىتتىڭ بار ەكەندىگىنە نازار اۋدارتتى.
«ونىڭ بىزدەگى دامۋى ءالى دە بولسا كەنجەلەپ تۇر. ال كوپتەگەن مەملەكەت بانك تۋرالى زاڭدارىنىڭ ارقاسىندا وسى باعىتتى كەڭىنەن قولدانىپ، ەكونوميكاعا زور سەرپىن بەرەتىندەي جاعداي جاساپ وتىر. بۇعان قوسا، بانكتەرگە قاتىستى زاڭنىڭ قابىلدانۋىنىڭ ءوزى بىزدەگى كوپتەگەن بانككە قوزعالىس اكەلەتىن سياقتى. ويتكەنى، مەملەكەت باسشىسى مۇنىڭ الدىنداعى تاپسىرمالارىنىڭ بىرىندە «ەكونوميكانى نەسيەلەندىرۋدى جەدەلدەتپەيتىن بولسا، بەلسەندى جۇمىس ىستەي الماسا، وندا شەتەلدىك بانكتەردى تارتۋ قيىندىق تۋعىزبايتىنىن» اشىق ايتقان ەدى. دەمەك، بۇل دا - بانكتەر ءۇشىن ۇلكەن بەلگى. سوندىقتان بانكتەردىڭ ەكونوميكاعا قارجى قۇيۋ مادەنيەتىن، قاعيداسىن ارتتىرۋدىڭ ءتيىمدى ءارى توتە جولى - بانكتەر تۋرالى ارناۋلى زاڭ قابىلداۋ. سونىڭ ناتيجەسىندە ەكونوميكانى بەلسەندى نەسيەلەندىرەتىن بانك جۇيەسىن قالىپتاستىرۋىمىز قاجەت»، - دەدى باۋىرجان ىسقاقوۆ.
ايتا كەتەيىك، كەشە مەملەكەت باسشىسى قازاقستان حالقىنا جولداعان جولداۋىندا بانكتەر تۋرالى جاڭا زاڭ قاجەت ەكەنىن ايتقان بولاتىن.
اۆتور
مارلان جيەمباي
