بانكتەر تۋرالى زاڭ جوباسى: يسلامدىق قارجىلاندىرۋ نازارعا الىنادى
استانا. KAZINFORM - جاڭا زاڭ جوباسى اياسىندا بانكتەر ءۇشىن يسلامدىق قارجىلاندىرۋ قاعيداتتارى بويىنشا قىزمەت كورسەتۋ مۇمكىندىگى قاراستىرىلعان. بۇل تۋرالى ءماجىلىس ءتوراعاسىنىڭ ورىنباسارى دانيا ەسپايەۆا ءمالىم ەتتى.
- بانك ليتسەنزيالارىنىڭ تۇرلەرىن سارالاۋ باسەكەلەستىكتى ارتتىرۋدا ماڭىزدى فاكتور سانالادى. قازىرگى كەزدە رەتتەۋشى تالاپتار بارلىق بانكتەر ءۇشىن ءبىرىڭعاي. زاڭ جوباسىندا تالاپتارى از بازالىق بانك ليتسەنزياسىن ەنگىزۋ ۇسىنىلادى، بۇل جاڭا سۋبەكتىلەردىڭ نارىققا كىرۋىنە كەدەرگىلەردى ازايتۋعا مۇمكىندىك بەرەدى. سونداي- اق، باسەكەلەستىكتى ارتتىرۋ ءۇشىن يسلامدىق قارجىلاندىرۋدى دامىتۋ قاجەت. بۇگىندە قازاقستاندا ەكى يسلام بانكى جۇمىس ىستەيدى («ADCB» يسلام بانكى» اق جانە «زامان بانك» يسلام بانكى» ا ق). قارالىپ وتىرعان زاڭ جوباسى اياسىندا ءبىزدىڭ بانكتەر ءۇشىن يسلامدىق قارجىلاندىرۋ قاعيداتتارى بويىنشا قىزمەتتەر كورسەتۋ مۇمكىندىگى كوزدەلەدى، - دەدى د. ەسپايەۆا پارلامەنت ماجىسىندە بانك قىزمەتى تۋرالى زاڭ جوباسىنىڭ تانىستىرىلىمى كەزىندە
ونىڭ ايتۋىنشا، قازىرگى بانكتەر مەن قارجى ۇيىمدارى ءوز جۇمىسىندا باسشىلىققا الاتىن قولدانىستاعى زاڭ 30 جىل بۇرىن قابىلدانعان. ول كەزدە قارجى سالاسىنا سيفرلىق تەحنولوگيالار ەندى عانا ەنگىزىلە باستاعانىن تۇسىنگەن ءجون. قازىر بانكتەر قىزمەت تيىمدىلىگىن ارتتىرۋ جانە قارجىلىق قىزمەتتەر ۇسىنۋ ءۇشىن جاڭا تەحنولوگيالاردى بەلسەندى تۇردە ەنگىزىپ، وعان قوماقتى قاراجات سالىپ جاتىر.
- وسىعان بايلانىستى بانكتەرگە قارجىنى فينتەح- كومپانيالارعا ينۆەستيتسيالاۋ مۇمكىندىگى بەرىلەدى، بۇل يننوۆاتسيالىق فينتەح- ونىمدەر مەن سەرۆيستەر قۇرۋعا جول اشادى. سونىمەن قاتار، زاڭ جوباسىندا سيفرلىق تەڭگەنى بەلسەندى دامىتۋ، يفرلىق قارجى اكتيۆتەرىنىڭ اينالىمى ءۇشىن ينفراقۇرىلىم قۇرۋ، كريپتو ايىرباستاعىشتاردى دامىتۋ كوزدەلگەن. الايدا، سيفرلىق تەحنولوگيالاردى ەنگىزۋ ازاماتتارىمىزدى قورعاۋ ماسەلەلەرىنە باسا نازار اۋدارۋدى قاجەت ەتەدى. بانكتىك قىزمەتتەردى سيفرلاندىرۋ ارقىلى كرەديت الۋ مۇمكىندىگى ەداۋىر جەڭىلدەپ، جەدەل بەرىلە باستادى. ءبىراق سونىمەن بىرگە بۇل ينتەرنەت- الاياقتىقتىڭ ورشۋىنە سەبەپ بولدى.
وسىعان بايلانىستى، دەپۋتاتتارعا زاڭ جوباسىن قاراۋ كەزىندە قارجىلىق قىزمەتتەردى، تۇتىنۋشىلاردى قورعاۋ تەتىكتەرىن كۇشەيتۋ جانە ولاردىڭ دەربەس دەرەكتەرىن قورعاۋ شارالارىنا ەرەكشە نازار اۋدارۋ قاجەت، - دەدى دەپۋتات.
ەسكە سالساق، بيىلعى جولداۋدا مەملەكەت باسشىسى قاسىم-جومارت توقايەۆ بانكتەر تۋرالى زاڭدى 2025 -جىلدىڭ اياعىنا دەيىن قابىلداۋ كەرەك ەكەنىن اتاپ ءوتتى.
