ب ۇ ۇ قورى ەلىمىزدەگى ەكولوگيالىق جوبالارعا قوماقتى قاراجات بولەدى

استانا. KAZINFORM – ب ۇ ۇ- نىڭ جاسىل كليماتتىق قورى قازاقستانداعى 280 ميلليون دوللار سوماسىنا ەكولوگيالىق جوبالاردى قارجىلاندىرادى. بۇل تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ءمالىم ەتتى.

- جاسىل كليماتتىق قور، كليماتتىڭ وزگەرۋىنە قارسى كۇرەستە جانە وعان بەيىمدەلۋدە ەلدەردى قولداۋدىڭ نەگىزگى قارجىلىق تەتىگى بولىپ تابىلادى. حالىقارالىق ۇيىمداردىڭ قولداۋىمەن قازاقستانعا وسى قور تاراپىنان شامامەن 280 ميلليون ا ق ش دوللارىنا قارجىلاندىرۋ كەلىپ تۇسەتىنى قاراستىرىلعان. اتالعان قاراجات جاڭارتىلاتىن ەنەرگيا كوزدەرىن دامىتۋعا، ونەركاسىپ سەكتورىندا تومەن كومىرتەكتى تەحنولوگيالاردى ەنگىزۋدى ىنتالاندىرۋعا، سونداي-اق ەلەكتروموبيلدەردى دامىتۋدى قولداۋعا باعىتتالدى، - دەدى ە. نىسانبايەۆ سەناتتا ەكولوگيا سالاسىندا وزىق تەحنولوگيالاردى ەنگىزۋ تاقىرىبىن تالقىلاۋ كەزىندە.

مينيستر جاسىل جوبالاردى ىلگەرىلەتۋ ءۇشىن Readiness II جوباسى اياسىندا 2024 -جىلى جاسىل كليماتتىق قورعا ارنالعان ەلدىك باعدارلاما دايىندالعانىن ەسكە سالدى. وعان 7 جوبا ەنگىزىلگەن. جوبالار ەنەرگەتيكا سەكتورىنداعى پارنيكتىك گازدار شىعارىندىلارىن ازايتۋعا، اۋىلدى ەلدى مەكەندەردەگى ورتالىقتاندىرىلعان سۋمەن جابدىقتاۋ جۇيەلەرىنىڭ تۇراقتىلىعىن ارتتىرۋعا، مال شارۋاشىلىعى فەرمالارىن جاڭعىرتۋعا، سونداي-اق «جاسىل» قارجىلاندىرۋ سالاسىنداعى جەكە سەكتوردىڭ باستامالارىن قولداۋعا باعىتتالعان. بۇل جوبالاردىڭ قۇنى شامامەن 1 ميلليارد ا ق ش دوللاردى قۇراسا، ونىڭ 630 ميلليونىن اتالعان قور قارجىلاندىرۋى مۇمكىن.

سونىمەن قاتار، قازاقستاندا جاڭارتىلاتىن ەنەرگيا كوزدەرى بويىنشا جاسىل كليماتتىق قور مەن ەۋروپالىق قايتا قۇرۋ جانە دامۋ بانكى باعدارلاماسى اياسىندا جالپى قۋاتتىلىعى 330 م ۆ ت بولاتىن جاڭارتىلاتىن ەنەرگيا كوزى سالاسىندا 11 جوبانىڭ قۇرىلىسىن قولداۋ كوزدەلگەن. قازىر 9 جوبا قارجىلاندىرىلدى (جوبانى ىسكە اسىرۋ مەرزىمى 2017- 2027 -جىلدار).

بۇدان بۇرىن حابارلانعانداي، سەناتتاعى جيىندا دەپۋتات ءالي بەكتايەۆ ەلىمىزدە ەكولوگيا سالاسىندا وزىق تەحنيكالارعا كوشۋ پروتسەسى باستالعانىمەن، ونى ىسكە اسىرۋ ارەكەتى كوپتەگەن جۇيەلىك كەدەرگىلەرگە تاپ بولعانىن ايتتى.

اۆتور

رۋسلان عابباسوۆ