اۋىل اكىمدەرىنىڭ بەدەلى جوق - ءماجىلىس دەپۋتاتى
استانا. KAZINFORM - ءماجىلىس دەپۋتاتى اناس باققوجايەۆ اۋىل اكىمدەرىنىڭ بەدەلىن، قۇزىرەتىن كوتەرۋ ماسەلەسىن كوتەردى.
«قازىر اۋىل اكىمدەرىنىڭ ەشقانداي بەدەلى جوق. اۋىل اكىمىنىڭ حالىقپەن كەزدەسۋىنە ەشكىم بارمايدى، جينالاتىنى 10-اق ادام. ال اۋىلدا بىرەۋ اس بەرسىنشى، ءبارى جينالادى. نەگە؟ سەبەبى ول جەردە قىزىق اڭگىمەلەسەدى، وي ءبولىسىپ، ءبىر-ءبىرىن تىڭدايدى. پايداسى بار، اكىمدەردىڭ جينالىسىنان پايدا جوق، نەگە؟ اكىمدەردىڭ قۇزىرەتى دە، بەدەلى دە جوق. اۋدان اكىمدەرى اۋىل اكىمدەرىن كۇندە شاقىرىپ الادى، كۇندە جينالىس. سيفرلاندىرۋ بار، ۆيدەوكامەرا بار، سوندا دا كەل دەپ شاقىرىپ الادى، كەدەيدىڭ كەڭەسى بىتپەيدى دەيدى. اكىم قاشان حالىقپەن جۇمىس ىستەيدى؟»، - دەدى اناس باققوجايەۆ ءماجىلىس جانىنداعى قوعامدىق پالاتا وتىرىسىندا.
حالىق قالاۋلىسىنىڭ ايتۋىنشا، تۇرعىنداردىڭ ماسەلەسىن شەشۋگە اكىمنىڭ اقشاسى جوق.
«سوندىقتان دا حالىق اكىمدەردىڭ حالىقپەن كەزدەسۋىنە كەلمەيدى. اكىمنىڭ نەگە قۇزىرەتى جوق دەگەنگە كەلسەك، ايتالىق مال دارىگەرى سىرعاسىز جۇرگەن مالدى كورگەندە قوجايىنىنا ايىپپۇل سالۋ ءۇشىن ينسپەكتوردى كۇتۋ كەرەك، قاشان وسىنى توقتاتامىز؟ اكىمدەر نەسيە، ءارتۇرلى گرانتتار بەرەمىز دەپ كەپىل بەرە المايدى. اكىم جازعان حاتپەن ەشكىم ساناسپايدى. مەنىڭ ايتارىم، ەڭ الدىمەن حالىقتىڭ تۇرمىس جاعدايىن جاساپ، IV دەڭگەيدەگى بيۋدجەتتى كوتەرۋىمىز كەرەك. ەكىنشىدەن اكىمنىڭ قۇزىرەتىن كۇشەيتۋىمىز كەرەك. ءماسليحاتقا ءتيىسىپ كەرەگى جوق، ولار جاقسى جۇمىس ىستەپ جاتىر. ءبىراق، ءماسليحاتتىڭ دا بەدەلىن كوتەرۋىمىز قاجەت»، - دەيدى ول.
ايتا كەتەيىك، بۇگىن ءماجىلىس جانىنداعى قوعامدىق پالاتادا جەرگىلىكتى ءوزىن- ءوزى باسقارۋ ماسەلەلەرىنە ارنالعان جيىن ءوتتى.
سول جەردە اۋىل اكىمدەرىنىڭ سايلاۋالدى ۋادەسىنىڭ ورىندالۋىنا مونيتورينگ جۇرگىزىلەتىنى ايتىلدى.
سونداي- اق، جەرگىلىكتى ءوزىن-ءوزى باسقارۋداعى اۋىل بيۋدجەتىنىڭ كىرىس كوزدەرىن كەڭەيتۋ جاعى قوزعالدى.
اۆتور
داۋلەت ىزتىلەۋ
