ايبەك سمادياروۆ قازاق-اۋعان ىنتىماقتاستىعى تۋرالى: مۇنىڭ ساياسي جاعى دا بار

استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۆەدومستۆونىڭ كەزەكتى باسپا ءسوز ءماسليحاتىندا قازاق-اۋعان ىنتىماقتاستىعىنىڭ ارتۋ سەبەبىن اتادى.

- اۋعانستان مەن قازاقستان اراسىنداعى تاۋار اينالىمى 1 ميلليارد دوللارعا جۋىق. ەۋروپانىڭ بىرنەشە ەلىمەن اراداعى تاۋار اينالىمىن قوسقاننىڭ وزىندە ونداي سوما شىقپاۋى مۇمكىن. سوندىقتان ءبىز ولارمەن جاقسى ساۋدا جۇرگىزەمىز. ءبىزدىڭ ساۋدا جانە ينتەگراتسيا مينيسترلىگى بىرنەشە رەت بيزنەس فورۋم وتكىزدى. سوندىقتان بۇل كورشىمەن ءالى دە كەلەشەكتە جۇمىس ىستەيمىز دەپ ۇمىتتەنەمىز. 40 ميلليونعا جۋىق حالقى بار ەلمەن قالاي جۇمىس ىستەمەيمىز؟ استانا حالىقارالىق فورۋمىنا شاقىرعانىمىز، بىرنەشە ەكىجاقتى جوبا بار. ولاردى كەلەشەكتە ايتا جاتامىز، - دەدى ول.

سونداي-اق ول الماتىدا ب ۇ ۇ حابى اشىلاتىنىن ەسكە سالدى.

- بۇل ىنتىماقتاستىقتىڭ ساياسي ماعىناسى دا بار. الماتىدا ب ۇ ۇ- نىڭ ارنايى حابى اشىلايىن دەپ جاتىر. ول حاب اۋعانستان ماسەلەسىنە دە ارنالعان. سوندىقتان ءبىز اۋعانستانمەن تىعىز جۇمىس ىستەۋگە ۇمىتتەنەمىز، - دەدى ايبەك سمادياروۆ.

جۋرناليستەر ەكى ەل ازاماتتارىنىڭ ۆيزا راسىمدەۋ پروتسەسى قاشان جەڭىلدەيتىنىن سۇراعان.

- جوق ءالى. وعان ەرتە. تەك ساۋدا جاساپ جاتىرمىز، - دەدى س ءى م رەسمي وكىلى.

ەسكە سالساق، «قازاتوم ونەركاسىپ» ۇلتتىق اتوم كومپانياسىنىڭ باسقارما ءتوراعاسى مەيىرجان يۋسۋپوۆ قازاقستان اۋعانستاننان بەريلي شيكىزاتىن يمپورتتاۋى مۇمكىن ەكەنىن ءمالىم ەتكەن ەدى.

اۆتور

ەسىمجان ناقتىباي