اتىراۋداعى پرەزيدەنت رەزيدەنسياسى بالالار لاگەرى رەتىندە ءالى اشىلعان جوق
اتىراۋ. KAZINFORM - پرەزيدەنت 2023 -جىلعى اقپاندا 5 وڭىردەگى رەسمي قوناقتارعا ارنالعان رەزيدەنسيالاردى بالالاردىڭ قاجەتتىلىگىنە بەرۋدى تاپسىرعان ەدى. سول تاپسىرماعا سايكەس اتىراۋداعى بۇرىنعى رەزيدەنسيانى بالالار لاگەرىنە لايىقتاۋ كوزدەلىپ وتىر.
مەملەكەت باسشىسىنىڭ تاپسىرماسى بەرىلگەنىنە 2 جىلدان استى. سول كەزدە اتىراۋ وبلىسىنىڭ اكىمى سەرىك شاپكەنوۆ بۇرىنعى رەزيدەنسيا بالالاردى ساۋىقتىرۋ ورتالىعى رەتىندە ءبىر جىلدان سوڭ اشىلاتىنىن ايتقان ەدى. الايدا بۇل نىسان ءالى ىسكە قوسىلعان جوق.
اتىراۋ وبلىسى اكىمىنىڭ باسپا ءسوز حاتشىسى رۋسلان جۇماعازيەۆتىڭ مالىمەتىنشە، مەكەمە 200 ورىنعا ەسەپتەلگەن. لاگەرگە «جاس دارىن» دەگەن اتاۋ بەرىلگەن.
- «جاس دارىن» لاگەرىن پايدالانۋعا بەرۋگە دايىنداۋ، جەر تەلىمىنە قاتىستى قۇجاتتارىن رەسىمدەۋ جۇمىسى اياقتالدى. نىساندا گاز بەن سۋ قۇبىرى جەلىسىنىڭ بولماۋىنا بايلانىستى ونى پايدالانۋ تەك ەلەكتر ەنەرگياسى ەسەبىنەن مۇمكىن بولادى. ءبىراق بۇل ەكونوميكالىق تۇرعىدان ءتيىمسىز. لاگەردى جىل بويى جانە ءتيىمدى پايدالانۋ ماقساتىندا ودان ءارى جاڭعىرتۋ، ونىڭ ىشىندە گاز جانە سۋمەن قامتۋ ءۇشىن ينجەنەرلىك جەلىلەر جۇرگىزۋ، جاتىن كورپۋستارىن، اسحانا مەن باسقا دا قۇرىلىستاردى كەڭەيتۋ، بالالاردىڭ بوس ۋاقىتىن وتكىزۋگە ارنالعان قوسىمشا نىسان سالۋ جولىمەن قالىپتى جاي-كۇيگە كەلتىرۋ جوسپارلانىپ وتىر. بۇل جۇمىستى 2025 -جىلدىڭ ءبىرىنشى جارتىسىندا جۇرگىزۋ، جيھاز بەن باسقا قۇرال-جابدىقتاردى جاڭارتۋ كوزدەلگەن، - دەپ حابارلادى رۋسلان جۇماعازيەۆ.
قازىر بۇرىنعى رەزيدەنسيانىڭ نىسانالى ماقساتىن وزگەرتۋ ءۇشىن قۇجاتتار دايىندالعان. نىساندا قۇرىلىس جۇمىستارىنا دايىندىق جۇرگىزىلىپ جاتىر.
پرەزيدەنتتىڭ بۇرىنعى رەزيدەنسياسى ماحامبەت اۋدانىنداعى اققايىڭ اۋىلىندا ورنالاسقان. بۇرىن مۇندا رەسمي قوناقتاردى قابىلداۋعا ارنالعان ءۇي بولعان.
جايىق وزەنىنىڭ وڭ جاعالاۋىنداعى رەزيدەنسياعا جاقىن ماڭنان «اتىراۋ- ورال» تاسجولى وتەدى.
بۇرىنعى رەزيدەنسيا جانىندا شاعىن جاعاجاي، ۇلكەن الما باعى، تىكۇشاق قوناتىن الاڭ بار. وزەنگە دەيىن اسفالت جول توسەلگەن.
اققايىڭ قانداي اۋىل؟
اققايىڭ - بەيبارىس اۋىلدىق وكرۋگىنىڭ قۇرامىنداعى ەلدى مەكەن. 2006 -جىلعا دەيىن سوروچينكو اتالعان. سوڭعى 35 جىلدان بەرى تۇرعىندار سانى ەدەۋىر ازايعان.
ماسەلەن، 1989 -جىلى ەلدى مەكەندەگى تۇرعىندار سانى 174 ادام بولعان. 1999 -جىلى 130 ادام تۇرعان. ونىڭ ىشىندە 60 ەر، 70 ايەل ادام. مۇندا 2009 -جىلى 89 ادام (46 ەر، 43 ايەل) قالعان.
ەلىمىزدەگى 2021 -جىلعى ساناق قورىتىندىسىمەن اتالعان اۋىلدا 78 ادامنىڭ تۇراتىنى ەسەپكە الىنعان. ءبىر قىزىعى، ەرلەردىڭ سانى ايەلدەردەن 2 ەسە كوپ بولىپ شىققان.
وكرۋگ اكىمى سەيىلبەك زۇلحاشيەۆتىڭ دەرەگىنە قاراعاندا، قازىر اققايىڭدا 80 ادام تىركەلگەن. الايدا، ناقتى تۇراتىنداردىڭ سانى - 25 ادام.
- بۇل ەلدى مەكەن اتىراۋ قالاسىنان شامامەن 30 شاقىرىم قاشىقتىقتا ورنالاسقان. ال بەيبارىس اۋىلىنان تىكە جولمەن جۇرسە، قاشىقتىق 5 شاقىرىمداي بولادى. مۇندا وتكەن جىلى فەلدشەرلىك- اكۋشەرلىك پۋنكت سالىندى. ازىرگە پايدالانۋعا بەرىلگەن جوق. اۋىلدا سۋ، جارىق، گاز جەلىلەرى بار. اۋىز سۋ جايىق وزەنىنەن الىنادى. تۇرعىندارعا بەرىلەر الدىندا سۋ تازارتۋ قوندىرعىسىندا سۇزگىدەن وتكىزىلەدى. ءبىراق اۋىلداعى 12 وتباسى عانا سۋدىڭ اقىسىن تولەيدى. سول سەبەپتەن جازعى سۋ قۇبىرىن جۇرگىزۋ ءتيىمسىز بولىپ وتىر، - دەيدى سەيىلبەك زۇلحاشيەۆ.
ونىڭ ايتۋىنشا، اققايىڭ اۋىلىنا قوعامدىق كولىك قاتىنامايدى. ەلدى مەكەندە مەكتەپ پەن بالاباقشا، ءتىپتى دۇكەن جوق.
- تۇرعىنداردىڭ بارىندە دەرلىك جەكە كولىك بار. ازىق-تۇلىكتى، وزگە دە قاجەت زاتتاردى بەيبارىس اۋىلىنان، اتىراۋ قالاسىنان اكەلەدى. اۋىل تۇرعىندارى قوي مەن سيىر ۇستايدى. كوكونىس پەن باقشا داقىلدارىن ەكپەيدى، - دەدى سەيىلبەك زۇلحاشيەۆ.
اۆتور
جولداسبەك شوپەعۇل
