اتىراۋدا پوليەتيلەن شىعاراتىن العاشقى زاۋىتتىڭ قۇرىلىسى باستالدى
اتىراۋ. KAZINFORM - بۇگىن اتىراۋ وبلىسىندا پوليەتيلەن شىعاراتىن زاۋىتتىڭ قۇرىلىسى باستالدى. بۇل - ەلىمىزدە وسىنداي ءونىم شىعاراتىن العاشقى ءوندىرىس ورنى.
اتىراۋ وبلىسىنداعى «ۇلتتىق يندۋستريالىق مۇناي- حيميا تەحنوپاركى» ارنايى ەكونوميكالىق ايماعىندا پوليەتيلەن وندىرەتىن زاۋىتتىڭ قۇرىلىس جۇمىستارى باستالدى. جوباعا تارتىلعان ينۆەستيتسيا كولەمى شامامەن 7,4 ميلليارد ا ق ش دوللارى. زاۋىتتىڭ قۋاتى - جىلىنا 1,25 ميلليون توننا پوليەتيلەن.
اتىراۋ وبلىسىنىڭ اكىمى سەرىك شاپكەنوۆتىڭ ايتۋىنشا، بۇل جوبا مەملەكەت باسشىسى قاسىم-جومارت توقايەۆتىڭ ەلىمىزدىڭ باتىسىندا مۇناي-گاز-حيميا ونەركاسىبى كلاستەرىن دامىتۋ جونىندەگى تاپسىرماسىمەن قولعا الىنعان. جاڭا زاۋىت قازاقستاننىڭ وڭدەۋ ونەركاسىبىندەگى ەڭ اۋقىمدى جوباعا اينالادى.
قۇرىلىس جۇمىستارىن 2029 -جىلى اياقتاۋ جوسپارلانعان. بۇل جوبا ەل ەكونوميكاسىنا قالاي ىقپال ەتەدى؟
مامانداردىڭ تۇسىندىرۋىنشە، بىرىنشىدەن، زاۋىت قۇرىلىسىنا 8 مىڭعا جۋىق ادام تارتىلادى. ەكىنشىدەن، ىسكە قوسىلعان كەزدە 800 تۇراقتى جۇمىس ورنى اشىلادى. ۇشىنشىدەن، يمپورتتالاتىن پوليەتيلەن كولەمىن وتاندىق ونىممەن الماستىرۋعا، قوسىلعان قۇنى جوعارى ءونىم ەكسپورتىن ۇلعايتۋعا جول اشادى. تورتىنشىدەن، بۇل جوبا ىشكى جالپى ءونىم كورسەتكىشىنىڭ 1,2 پايىزعا وسۋىنە مۇمكىندىك بەرەدى. بەسىنشىدەن، ۇقساس سالالار مەن ەلدەگى جاڭا ءونىم شىعاراتىن وندىرىستەردىڭ دامۋىنا ىقپال ەتەدى.
ال پوليەتيلەن قانداي ءونىم؟
بۇل - الەمدە ەڭ كوپ سۇرانىسقا يە پلاستيك. مۇنداي ءونىم ەكونوميكانىڭ بارلىق سالاسىندا كەڭىنەن قولدانىلادى. ماسەلەن، كۇندەلىكتى تۇرمىستا جانە ونەركاسىپتە كەڭىنەن پايدالانىلاتىن قۇبىرلار، قۇرىلىس يندۋسترياسىنداعى جانە وراۋعا ارنالعان ماتەريالدار، اۆتوبولشەكتەر، مەديتسينالىق جابدىقتار مەن باسقا دا تاۋارلاردىڭ قۇرامىندا پوليەتيلەن بار.
جوسپارعا سايكەس بۇل زاۋىتتا پوليەتيلەننىڭ 22 ماركاسىن شىعارۋ كوزدەلگەن. وسىنداي ءونىمنىڭ 40 پايىزى جوعارى ساپالى پرەميۋم ساناتىنا جاتادى. بۇعان Axens (فرانسيا)، Univation Technologies (ا ق ش) جانە Chevron Phillips Chemical (ا ق ش) كومپانيالارىمەن جاسالعان ليتسەنزيالىق كەلىسىمدەردىڭ ناتيجەسىندە قول جەتكىزىلگەن.
پوليەتيلەن نەدەن وندىرىلەدى؟ مامانداردىڭ ايتۋىنا قاراعاندا، بۇل ءونىمدى ءوندىرۋ ءۇشىن شيكىزات رەتىندە ەتان قولدانىلادى. ال، ەتان «تەڭىز» كەن ورنىنان الىناتىن قۇرعاق گازدان بولىنەدى.
ەسكە سالا كەتەلىك، بۇعان دەيىن اتىراۋدا جۇك ۆاگوندارىن شىعاراتىن زاۋىت ىسكە قوسىلعانىن حابارلاعان بولاتىنبىز.
اۆتور
جولداسبەك شوپەعۇل
