اتىراۋ وبلىسىندا 100 ميلليون تەڭگەنىڭ ينۆەست جوباسىنا كەدەرگى كەلتىرىلگەن
اتىراۋ. KAZINFORM - اتىراۋ وبلىسىندا 100 ميلليون تەڭگەنىڭ ينۆەستيتسيالىق جوباسىنا كەدەرگى كەلتىرىلگەنى انىقتالىپ وتىر.
اتىراۋ وبلىسى پروكۋراتۋراسىنىڭ اقپاراتىنا قاراعاندا، فرونت-وفيستە ينۆەستورلاردىڭ شاعىمى جەدەل تۇردە قاراستىرىلعان.
«فرونت- وفيستە ينۆەستورعا جاردەم كورسەتۋ جانە ۋاكىلەتتى ورگان جول بەرگەن زاڭ بۇزۋشىلىقتاردى جويۋ ماسەلەسى قارالدى. ماقسات - مەملەكەت باسشىسىنىڭ تاپسىرماسىنا سايكەس ينۆەستيتسيالىق جوبالاردى سۇيەمەلدەۋگە قولداۋ كورسەتۋ. ماسەلەن، «ا. سيسەنوۆ» جەكە كاسىپكەرلىگى جىلىوي اۋدانىنىڭ قۇلسارى قالاسىندا جالپى قۇنى 100 ميلليون تەڭگەنى قۇرايتىن ينۆەستيتسيالىق جوبانى ىسكە اسىرىپ جاتىر. ينۆەستور ءسۇت جانە ءسۇت ونىمدەرىن وندىرۋگە ارنالعان جوبانى ىسكە اسىرۋ كەزىندە اۋماقتىق ۆەتەريناريالىق باقىلاۋ جانە قاداعالاۋ ينسپەكسياسى تاراپىنان كەدەرگىگە تاپ بولىپ وتىر. جەرگىلىكتى ينسپەكسيا ۆەتەريناريالىق-سانيتاريالىق قورىتىندى بەرۋدەن نەگىزسىز باس تارتقان. وسىلايشا جوباعا اكىمشىلىك كەدەرگى كەلتىرىلدى»، - دەپ حابارلادى وبلىستىق پروكۋراتۋرادان.
پروكۋراتۋرانىڭ قاداعالاۋ اكتىسى بويىنشا ينسپەكتسيا باسشىسى كاسىپكەرگە قورىتىندى بەرۋدەن نەگىزسىز باس تارتقانى ءۇشىن تارتىپتىك جاۋاپكەرشىلىككە تارتىلعان. ال، ينۆەستورعا سالالىق قورىتىندى بەرىلگەن.
«ينۆەستورلاردىڭ قۇقىقتارىن قورعاۋ جانە ينۆەستيتسيالىق جوبالاردى سۇيەمەلدەۋ جونىندەگى جۇمىس جالعاسىن تابادى. بۇل قاداعالاۋ ورگانىنىڭ جانىنداعى موبيلدى توپتىڭ ۇدايى باقىلاۋىندا بولادى»، - دەپ ءمالىم ەتتى وبلىستىق پروكۋراتۋرادان.
ەسكە سالا كەتەلىك، بۇعان دەيىن اتىراۋدا مۇناي كومپانياسى مەملەكەتكە 673,1 ميلليون زالال كەلتىرگەنىن حابارلاعان بولاتىنبىز.
اۆتور
جولداسبەك شوپەعۇل
