استاناداعى فورۋم اياسىندا اياسىندا 800 ميلليون استام دوللارعا ينۆەستيتسيالىق كەلىسىمدەر بەكىتىلدى

استانا. KAZINFORM - سونىمەن بىرگە، استانا اكىمدىگىنىڭ الدىن الا باعالاۋىنشا، فورۋم كۇندەرى ەلورداعا 5 مىڭنان استام شەتەلدىك قوناقتىڭ كەلۋى قوناق ۇيلەر، مەيرامحانالار، كولىك قىزمەتتەرى جانە قالانىڭ باسقا دا سالالارى ءۇشىن 2,6 ميلليارد تەڭگە تابىس اكەلدى.

استانا حالىقارالىق فورۋمى قارساڭىندا وتكەن «قازاقستان - فرانسيا» جانە «قازاقستان - يتاليا» بيزنەس- فورۋمدارىندا، سونداي-اق AIF 2025 الاڭدارىندا ەلىمىز ءۇشىن ماڭىزدى ءبىرقاتار ينۆەستيتسيالىق كەلىسىمگە قول قويىلدى.

قازاقستان - فرانسيا بيزنەس-فورۋمى اياسىندا ەنەرگەتيكا، دەنساۋلىق ساقتاۋ، لوگيستيكا، اگروونەركاسىپ، ءبىلىم بەرۋ جانە ورنىقتى دامۋ سالالارىن قامتيتىن 15 كەلىسىم جاسالدى. ولاردىڭ ىشىندە پاۆلودار قالاسىندا سۋتەگىن وندىرەتىن قوندىرعى سالۋ جوباسى بار. بۇل جوباعا 90 ميلليون ەۋرودان استام ينۆەستيتسيا تارتىلماق.

ال قازاقستان - يتاليا بيزنەس- فورۋمىندا جالپى سوماسى 180 ميلليون ەۋرو بولاتىن 10 كەلىسىمگە قول قويىلدى. وندا لوگيستيكا، ماشينا جاساۋ، اۋىل شارۋاشىلىعى ونىمدەرىن قايتا وڭدەۋ، ونەركاسىپتى سيفرلاندىرۋ جانە «جاسىل» ەنەرگەتيكا سالالارىنداعى جوبالار قامتىلعان.

AIF-2025 الاڭىندا دا ءىرى كەلىسىمدەر جاسالدى. سىرتقى ىستەر مينيسترلىگىنىڭ ينۆەستيتسيالار كوميتەتى مەن «Kazak Protein» ج ش س تۇركيانىڭ Tiryaki Agro، قاتاردىڭ Hassad Food كومپانيالارىنىڭ قاتىسۋىمەن جانە KAZAKH INVEST ۇلتتىق كومپانياسىنىڭ قولداۋىمەن استانا قالاسىندا ءداندى-داقىلداردى تەرەڭ وڭدەيتىن كەشەن سالۋ جونىندە 320 ميلليون ا ق ش دوللارى كولەمىندەگى ينۆەستيتسيالىق كەلىسىمشارتقا قول قويدى.

سونىمەن بىرگە، KAZAKH INVEST يتاليالىق سەرىكتەستەرمەن تاعى 3 كەلىسىم جاساستى. ولاردىڭ قاتارىندا تۇركىستان وبلىسىندا TRAMITE Group جۇزەگە اسىراتىن 180 ميلليون دوللارلىق اگروونەركاسىپ جوباسى بار. جوبا جىلىجاي كەشەنى، قىزاناق وڭدەۋ زاۋىتى، جوڭىشقا تۇيىرشىكتەۋ جۇيەسى جانە باسقا دا ينفراقۇرىلىمداردى قامتيدى.

قارجىلىق قۇجاتتارمەن قاتار، AIF-2025 اياسىندا قازاقستان ەكونوميكاسى ءۇشىن ستراتەگيالىق ماڭىزى بار ءبىرقاتار كەلىسىمگە قول قويىلدى.

قازاقستان رەسپۋبليكاسى ۇكىمەتى مەن ەكونوميكالىق ىنتىماقتاستىق جانە دامۋ ۇيىمى (ە ى د ۇ) ەۋرازيالىق باسەكەگە قابىلەتتىلىك باعدارلاماسىن قارجىلاندىرۋ جونىندەگى كەلىسىمگە قول قويدى. قۇجات ەكونوميكالىق رەفورمالاردى ءتيىمدى جۇرگىزۋگە ارنالعان ساراپتامالىق قولداۋدى كوزدەيدى. بۇل باعدارلاما ە ى د ۇ ستاندارتتارىن ەنگىزۋ، قۇقىقتىق جانە ينستيتۋتسيونالدىق ورتانى جەتىلدىرۋ جانە ءوڭىردىڭ باسەكەگە قابىلەتتىلىگىن ارتتىرۋعا سەرپىن بەرەدى.

سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى Solana Foundation جانە Intebix كومپانيالارىمەن ورتالىق ازياداعى العاشقى بلوكچەين ايماعى — Solana Economic Zone Kazakhstan جوباسىن ىسكە قوسۋ تۋرالى مەموراندۋمعا قول قويدى.

سونداي- اق ساۋدا جانە ينتەگراتسيا مينيسترلىگىنىڭ قولداۋىمەن الماتى وبلىسىندا قازاقستانداعى ءبىرىنشى حالىقارالىق اۋتلەت-ورتالىق سالۋ جونىندە كەلىسىمگە قول قويىلدى. كەشەننىڭ جالپى اۋماعى 80 مىڭنان 120 مىڭ شارشى مەترگە دەيىن بولماق.

ەسكە سالا كەتسەك، 29-30 -مامىر كۇندەرى ەلوردادا استانا حالىقارالىق فورۋمى (AIF) ءوتتى.

اۆتور

ايجان سەرىكجان قىزى