استانادا قازاقستان-اۋعانستان ساۋدا بايلانىستارىن كەڭەيتۋ جولدارى تالقىلاندى
استانا. KAZINFORM – ق ر پرەمەر-ءمينيسترى ولجاس بەكتەنوۆ استانا حالىقارالىق فورۋمىنا قاتىسۋ ءۇشىن كەلگەن اۋعانستان ساۋدا جانە ونەركاسىپ ءمينيسترىنىڭ مىندەتىن اتقارۋشى نۋريددين ازيزيمەن كەزدەسۋ وتكىزدى، دەپ حابارلايدى ۇكىمەتتىڭ باسپا ءسوز قىزمەتى.
وندا ساۋدا-ەكونوميكالىق ىنتىماقتاستىقتى نىعايتۋ ماسەلەلەرى تالقىلاندى. كولىك-لوگيستيكا، گەولوگيالىق بارلاۋ، اۋىل شارۋاشىلىعى، سيفرلاندىرۋ، دەنساۋلىق ساقتاۋ، ءبىلىم بەرۋ جانە تاعى باسقا سالالارداعى ءوزارا ءىس-قيمىلدى كەڭەيتۋگە نازار اۋدارىلدى.
وتاندىق تاۋارلار ەكسپورتىن ءارتاراپتاندىرۋعا باسا نازار اۋدارا وتىرىپ، ساۋدا-ەكونوميكالىق ىنتىماقتاستىقتى جانداندىرۋ جونىندەگى شارالار قارالدى. قازاقستان اۋعانستاننىڭ نەگىزگى ساۋدا سەرىكتەستەرىنىڭ وندىعىنا كىرەدى. وتكەن جىلى تاۋار اينالىمى $545,2 ميلليوندى قۇرادى، ونىڭ ىشىندە قازاقستاندىق ءونىمنىڭ ەكسپورتى - $527,7 ميلليون.
تۋرگۋندي-گەرات ترانس اۋعان تەمىر جولىن سالۋ ماسەلەلەرى تالقىلاندى. جوبانى ىسكە اسىرۋ ءوڭىر ءۇشىن ستراتەگيالىق ماڭىزعا يە. اۋعانستان ورتالىق جانە وڭتۇستىك ازيا اراسىنداعى كوپىر بولىپ سانالادى جانە «سولتۇستىك-وڭتۇستىك» ءدالىزىنىڭ تيىمدىلىگىن ارتتىرۋدا ماڭىزدى ءرول اتقارا الادى. اۋعانستان اۋماعىندا قاتتى پايدالى قازبالاردى گەولوگيالىق بارلاۋ، ءوندىرۋ جانە وڭدەۋ بويىنشا بىرلەسكەن جوبالاردى ىسكە اسىرۋعا وتاندىق كومپانيالاردىڭ قاتىسۋ جوسپارلارى قارالدى.
سيفرلاندىرۋ سالاسىندا قازاقستاندىق تاراپ اۋعانستاندا جاڭا تەحنولوگيالاردى ەنگىزۋ بويىنشا كونسۋلتاتسيالار مەن ستراتەگيالاردى بىرلەسىپ ازىرلەۋدى جالعاستىراتىن بولادى.
- قازاقستان ءوڭىردىڭ ورنىقتى دامۋى ءۇشىن حالىقارالىق قوعامداستىقتىڭ كۇش-جىگەرىن شوعىرلاندىرۋعا ۇمتىلادى. بۇگىندە ەلىمىز اۋعانستاننىڭ نەگىزگى ساۋدا سەرىكتەستەرىنىڭ وندىعىنا كىرەدى جانە اۋعانستانداعى ازىق-تۇلىك داعدارىسىن ەڭسەرۋ بويىنشا حالىقارالىق سەرىكتەستەرمەن جانە ۇيىمدارمەن بەلسەندى ىنتىماقتاسادى. قازاقستان اۋعانستان نارىعىنا استىق پەن ۇننىڭ سەنىمدى جەتكىزۋشىسى بولىپ قالا بەرەدى. استىقتىڭ باسقا تۇرلەرىن، مال شارۋاشىلىعى ونىمدەرىن، كونديتەرلىك جانە ۇن ونىمدەرىن جەتكىزۋدى باستاۋعا دايىنبىز. جالپى، ءبىز تاۋارلار نومەنكلاتۋراسىن كەڭەيتۋگە مۇددەلىمىز. سول ءۇشىن گەراتتادا «قازاقستاننىڭ ساۋدا ءۇيىن» اشتىق جانە كابۋلدا دا قازاقستاندىق ساۋدا ءۇيىن اشۋعا نيەتتىمىز، - دەدى ولجاس بەكتەنوۆ.
نۋريددين ازيزي اۋعانستاننىڭ قازاقستانمەن بىرلەسكەن جوبالاردى ىسكە اسىرۋ سالاسىنداعى ءوزارا ءىس-قيمىلدى كەڭەيتۋگە مۇددەلىلىگىن جەتكىزدى. كەزدەسۋگە قاتىسۋشىلار قازاقستاندىق اۋىل شارۋاشىلىعى تەحنيكاسىن اۋعانستان نارىعىنا ەكسپورتتاۋ پەرسپەكتيۆالارىن ەرەكشە اتاپ ءوتتى.
- قازاقستان ءبىز ءۇشىن ساۋدا سالاسىنداعى ماڭىزدى ارىپتەس بولىپ سانالادى. بۇل باعىتتا ءبىز بىرلەسىپ ىسكە اسىرۋعا بولاتىن الەۋەتتى كورىپ وتىرمىز. ءبىزدى IT سالاسىنداعى قازاقستاندىق تەحنولوگيالار، اۋىل شارۋاشىلىعى سالاسىنداعى ءوندىرىس قىزىقتىرادى. سىزدەردىڭ ونىمدەرىڭىزدىڭ ساپاسى باسقا ەلدەرمەن سالىستىرعاندا ەڭ جوعارى. قازاقستاندا وندىرىلەتىن اۋىل شارۋاشىلىعى تەحنيكاسىنا دا قىزىعۋشىلىق بار، - دەپ اتاپ ءوتتى نۋريددين ازيزي.
بۇدان بولەك، جاقىندا الماتىدا اشىلعان ب ۇ ۇ وڭىرلىك ورتالىعىنىڭ ورتالىق ازيا جانە اۋعانستان ءۇشىن ورنىقتى دامۋ ماقساتتارى جونىندەگى قىزمەتىنە نازار اۋدارىلدى، ول ءوڭىردىڭ تۇراقتىلىعىن نىعايتۋعا جانە قارقىندى دامۋىنا ەلەۋلى ۇلەس قوسادى.
كەزدەسۋ قورىتىندىسى بويىنشا تاراپتار بارلىق پەرسپەكتيۆالى باعىتتار بويىنشا جان-جاقتى ءوزارا ءتيىمدى ىنتىماقتاستىقتى نىعايتۋ نيەتتەرىن جەتكىزدى.
