اسەت ماعاۋوۆ: مۇناي باعاسى بيىل 65 دوللار دەڭگەيىندە ساقتالۋى مۇمكىن

استانا. KAZINFORM - «قازمۇنايگاز» ۇلتتىق كومپانياسى باسقارما ءتوراعاسىنىڭ ورىنباسارى اسەت ماعاۋوۆ مۇناي باعاسىنىڭ قۇبىلۋى جانارماي باعاسىنا قالاي اسەر ەتەتىنى تۋرالى پىكىر ءبىلدىردى.

- مۇناي نارىعى ايتارلىقتاي قۇبىلمالى. كەز كەلگەن گەوساياسي نەمەسە ەكونوميكالىق فاكتور مۇناي باعاسىن ءتۇسىرىپ نەمەسە ءوسىرىپ جىبەرۋى مۇمكىن. «قازمۇنايگازعا» قاتىستى ايتساق، مۇنايىنىڭ 70 پايىزى ىشكى نارىقتا ساتادى. ول باعالار ەكسپورت باعاسىنان الدەقايدا تومەن. ەكسپورت باعاسى قۇبىلىپ جاتسا دا، ازىرگە ىشكى نارىقتاعى باعا ەڭ تومەنگى ەكسپورت باعاسىنىڭ دەڭگەيىندە قالىپ وتىر. سوندىقتان ءبىز ىشكە ساتاتىن 70 پايىز مۇنايدىڭ باعاسى قازىر سىرتتاعى مەجەلەردەن تاۋەلسىز. ونىڭ ۇستىنە بىزدە ديزەل مەن بەنزين ەكسپورتى شەكتەۋلى - ءبارى ءوز ىشىمىزدە ساتىلادى، - دەدى ول.

ايتۋىنشا، «قازمۇنايگاز» ا ق مۇناي نارىعىنداعى تۇراقسىزدىققا دايىن.

- قالعان ەكسپورتقا كەتەتىن كولەم تۋرالى ايتساق، ساراپشىلار بيىل مۇناي باعاسى ءبىر باررەلىنە 65 دوللار دەڭگەيىندە ساقتالاتىنىن ايتىپ وتىر. ءبىراق ناقتى بولجاپ ايتا المايدى. جالپى العاندا ءبىز «قازمۇنايگازعا» ەشقانداي قاتەر كورىپ وتىرعان جوقپىز. بالاما سسەناريلەر ازىرلەنگەن. تۇتاستاي العاندا، مۇناي باعاسىنىڭ كەز كەلگەن قۇبىلۋىنا دايىنبىز. كۇن سايىن قۇبىلىپ تۇر. ال نەگىزى ۇزاق مەرزىمدەگى ترەند ماڭىزدى. سوڭعى بولجامدار 65 دوللار دەڭگەيىندە بولاتىنىن ايتىپ وتىر، - دەدى اسەت ماعاۋوۆ.