اسكەرگە شاقىرۋ، بوساتۋ جانە كەيىنگە قالدىرۋ sms-حابارلاما ارقىلى جەتكىزىلەدى - مينيسترلىك
استانا. KAZINFORM - قورعانىس ءمينيسترىنىڭ ورىنباسارى دارحان احمەديەۆ وتاندىق اسكەر سالاسىندا ەنگىزىلىپ جاتقان سيفرلىق جوبالار تۋرالى ايتىپ بەردى.
«كۇزگى اسكەرگە شاقىرۋ بويىنشا 400 مىڭنان استام ادام مىندەتىن وتەۋدى كەيىنگە قالدىردى. ال كوكتەمگى اسكەرگە شاقىرۋمەن قوسساق بارلىعى 700 مىڭ ادام اسكەري مىندەتىن وتەۋ كەيىنگە قالدىرىلدى. ولاردىڭ قاتارىندا ستۋدەنتتەر، مۇگەدەك جاندار، ۇيلەنگەن، بالالارى بار ازاماتتار بار. ودان بولەك، دەپۋتاتتار مەن ءدىن قىزمەتشىلەردىڭ دە اسكەري مىندەتىن وتەۋدى كەيىنگە قالدىرۋ قۇقىعى بار، ءبىراق ولاردىڭ سانى از»، - دەدى دارحان احماديەۆ ەلوردادا وتكەن Digital army day ءىس-شاراسى بارىسىندا.
ونىڭ ايتۋىنشا، دەپۋتاتتار مەن ءدىن قىزمەتشىلەرى اسكەري مىندەتىن وتەۋدى كەيىنگە قالدىرۋ پروتسەسىن eGov پورتالى ارقىلى ونلاين راسىمدەيدى.
«ال اسكەرگە شاقىرىلاتىن قالعان ساناتتاعى ازاماتتارعا بۇل قىزمەت پرواكتيۆتى فورماتتا قولجەتىمدى. سونىمەن قاتار ەندى اسكەرگە شاقىرۋ sms-حابارلاما (1414) ارقىلى جىبەرىلەدى، دەگەنمەن قاعاز تۇرىندە اسكەري شاقىرتۋ قولدانىستان الىنبايدى، سەبەبى كەيبىر ازاماتتاردىڭ ۇيالى تەلەفون ءنومىرى بازادا تىركەلمەگەن. دەگەنمەن الداعى ۋاقىتتا تولىقتاي سيفرلىق فورماتقا كوشىرۋ جوسپارلانىپ وتىر»، - دەيدى ول.
ايتا كەتسەك، بۇگىن ەلوردادا Digital army day 2024 ءىس-شاراسى ءوتتى، ول جەردە قورعانىس مينيسترلىگىنىڭ سيفرلىق ترانسفورماتسياسى تانىستىرىلدى.
بۇعان دەيىن حابارلاعانىمىزداي اسكەري بولىمدەردە بەينەباقىلاۋ كامەرالارىنىڭ سانى ارتادى.
اۆتور
داۋلەت ىزتىلەۋ
