ءماجىلىستىڭ جالپى وتىرىسى قاڭتار قۇرباندارىن ءبىر مينۋت ۇنسىزدىكپەن ەسكە الۋدان باستالدى
استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا «جاڭا قازاقستان» دەپۋتاتتىق توبىنىڭ قاڭتار وقيعاسىنا قاتىستى ساۋالىنا ق ر باس پروكۋرورى بەرىك اسىلوۆتىڭ اۋىزشا جاۋابى تىڭدالىپ جاتىر، دەپ حابارلايدى قازاقپارات ءتىلشىسى.
«وسىدان تۋرا ءبىر جىل بۇرىن قاسىرەتتى قاڭتار وقيعاسى كەزىندە جازىقسىز جاندار ناقاقتان قازا بولدى. بۇگىنگى جالپى وتىرىسىمىزدى قاڭتار قۇرباندارىن ءبىر مينۋت ۇنسىزدىكپەن ەسكە الۋدان باستاۋدى ۇسىنامىن»، - دەدى ءماجىلىس ءتوراعاسى ەرلان قوشانوۆ.
بۇدان بۇرىن حابارلانعانداي، بۇگىن پارلامەنت ماجىلىسىندە قاڭتار وقيعاسىنا قاتىستى باس پروكۋراتۋرا، ىشكى ىستەر مينيسترلىگى جانە قورعانىس مينيسترلىگى ارنايى كورمە ۇيىمداستىردى.
اتاپ ايتقاندا، بىلتىر قاڭتاردا پوليتسيا دەپارتامەنتتەرىنەن، قارۋ-جاراق دۇكەندەرىنەن ۇرلانعان قارۋ مەن وق-ءدارى جانە باسقا دا زاتتار كورمەگە جەتكىزىلگەن. بۇل قارۋ-جاراقتىڭ بارلىعى جاپپاي تارتىپسىزدىككە قاتىسقان ادامداردان تاركىلەنگەن بولاتىن.
