الماتىدا «حالىق قاتىساتىن بيۋدجەت» باعدارلاماسىنا 6 مىڭنان استام ءوتىنىش ءتۇستى

الماتى. KAZINFORM - الماتىدا 25 -قىركۇيەك كۇنى «حالىق قاتىساتىن بيۋدجەت» باعدارلاماسى بويىنشا وتىنىمدەر قابىلداۋ اياقتالدى. وتىنىمدەردى قابىلداۋ 9 -قىركۇيەكتە اشىلعان بولاتىن.

بارلىعى budget.open-almaty.kz سايتىنا مەگاپوليس تۇرعىندارىنان 6118 جوبا كەلىپ ءتۇستى. ۇسىنىستاردىڭ سانى بويىنشا ناۋرىزباي اۋدانى كوش باستادى. تۇرعىندار 1370 جوبانى قاراۋعا جولدادى. ەكىنشى ورىندا جەتىسۋ اۋدانى - 1199 ءوتىنىم بەرىلگەن.

الماتىلىقتار ءوتىنىش بەرگەن نەگىزگى باعىت: قوعامدىق ورىنداردا ورىندىقتاردى، قوقىس جاشىكتەرىن ورناتۋ، بالالاردىڭ ويناۋى مەن ەرەسەكتەردىڭ دەمالۋىنا ارنالعان ورىنداردى جابدىقتاۋ جانە جوندەۋ بولدى.

باعدارلامانىڭ كەلەسى كەزەڭى - الماتى قالاسىنىڭ ءار اۋدان اكىمدىگى جانىنان قۇرىلعان ساراپتامالىق كەڭەستەردىڭ وتىنىشتەردى قاراۋى. 8 -قازانعا دەيىن ءاربىر ۇسىنىس كوميسسيادا قارالادى.

قانداي جوبالار قاراۋعا قابىلدانبايدى؟

- قۇرىلىس- مونتاجداۋ جۇمىستارىن جۇرگىزبەي، تەك ج س ق (جوبالىق-سمەتالىق قۇجاتتامانى) ازىرلەۋگە ارنالعان؛

- فراگمەنتتەلگەن (بولاشاقتا قوسىمشا ەلەمەنتتەردى ەنگىزۋدى تالاپ ەتەتىن)؛

- الماتى قالاسىن دامىتۋ باعدارلاماسىنا جانە قازاقستان رەسپۋبليكاسىنىڭ زاڭناماسىنا سايكەس كەلمەيتىن؛

- كوممەرتسيالىق سيپاتتاعى جانە ت. ب..

قاراۋدان كەيىن ءاربىر ءوتىنىم ءۇش مارتەبەنىڭ ءبىرىن الادى: «داۋىس بەرۋگە جىبەرىلدى»، «پىسىقتاۋ ءۇشىن قايتارىلدى» نەمەسە «قابىلدانبادى». «حالىق قاتىساتىن بيۋدجەتتىڭ» بارلىق ەرەجەلەرىنە سايكەس راسىمدەلگەن وتىنىمدەر ماقۇلدانادى جانە داۋىس بەرۋ كەزەڭىنە جىبەرىلەدى.

پىسىقتاۋ ءۇشىن قايتارىلعان ۇسىنىستاردىڭ اۆتورلارى وسى جىلدىڭ 9-14-قازان ارالىعىندا ءوز جوبالارىن تۇزەتىپ، وتىنىمدەردى قايتا قاراۋعا جىبەرۋ مۇمكىندىگىنە يە بولادى. داۋىس بەرۋگە جىبەرىلگەن جوبالار budget.open-almaty.kz ينتەرنەت- پورتالىندا جاريالانادى.

ەسكە سالايىق، بۇعان دەيىن ءبىر اپتا ىشىندە باعدارلاماعا تۇرعىنداردان 248 ءوتىنىش كەلىپ تۇسكەنىن جازعانبىز.

اۆتور

دوسبول اتاجان