الماتى وبلىسىندا پايدالانىلمايتىن اۋىل شارۋاشىلىعى جەرلەرى قايتارىلىپ جاتىر

قونايەۆ. KAZINFORM - الماتى وبلىسىندا 81,4 مىڭ گەكتار جەر مەملەكەت مەنشىگىنە قايتارىلدى.

الماتى وبلىستىق جەر قاتىناستارى باسقارماسىنىڭ باسشىسى امانجول كەنەسبايەۆتىڭ سوزىنشە، وڭىردە پايدالانىلماي كەلگەن 1322 جەر ۋچاسكەگە بولىنگەن 393,1 مىڭ گەكتار جەر انىقتالدى.

«پايدالانىلماي جاتقان جەرلەردى مەملەكەت مەنشىگىنە قايتارۋ - وبلىستىڭ جەر رەسۋرستارىن ءتيىمدى پايدالانۋعا مۇمكىندىك بەرەتىن ستراتەگيالىق مىندەت. ءبىز ءار گەكتار اۋىل شارۋاشىلىعى جەرى قوعام مەن ەكونوميكاعا پايدا اكەلۋى ءۇشىن جۇمىس ىستەپ جاتىرمىز»، - دەدى امانجول كەڭەسبايەۆ.

قازىر 81,4 مىڭ گەكتار جەر مەملەكەت مەنشىگىنە قايتارىلدى. جىل سوڭىنا دەيىن تاعى 70,0 مىڭ گەكتار جەردى قايتارۋ جوسپاردا.

«كەيبىر جاعدايلاردا پايدالانىلماي جاتقان جەرلەر سوت شەشىمدەرى ارقىلى مەملەكەت مەنشىگىنە قايتارىلادى. مىسالى، جالپى كولەمى 31,9 مىڭ گەكتار بولاتىن 63 جەر ۋچاسكەسى بويىنشا جالعا الۋ شارتتارىن بۇزۋ تۋرالى سوت شەشىمدەرى قابىلداندى. سونىمەن قاتار، كولەمى 49,4 مىڭ گەكتار بولاتىن 246 جەر ۋچاسكەسى ەرىكتى تۇردە جانە باسقا دا جولدارمەن مەملەكەت مەنشىگىنە قايتارىلدى»، - دەپ اتاپ ءوتتى ول.

جەر قاتىناستارى باسقارماسى سونداي-اق جەرگە سالىناتىن سالىقتىڭ تيىمدىلىگىن ارتتىرۋ ءۇشىن 162,3 مىڭ گەكتار جەرگە ارنالعان 454 ماتەريالدى 20 ەسە سالىق ستاۆكاسىن ارتتىرۋ ءۇشىن حات جىبەرگەنىن حابارلادى.

«مەملەكەتتىك كىرىستەر دەپارتامەنتىنە 18,2 مىڭ گەكتار جەردى قامتيتىن 164 ۋچاسكە بويىنشا جوعارى سالىق ستاۆكالارىن قولدانۋ ءۇشىن ماتەريالدار جىبەرگەن. ءقازىر باسقارمادا تاعى 74,3 مىڭ گەكتار جەر بويىنشا جۇمىس جۇرگىزىلىپ جاتىر»، - دەدى باسقارما باسشىسى.

وسىعان دەيىن وڭىردە جالپى اۋماعى 72,9 مىڭ گەكتار بولاتىن، 257 جەر ۋچاسكەسى مەملەكەت مەنشىگىنە قايتارىلعانى تۋرالى جازعان ەدىك.

اۆتور

الما مۇقانوۆا