الاكول جاڭارىپ جاتىر: جاعالاۋ مەن جولدار جوندەلىپ، قاۋىپسىزدىك شارالارى كۇشەيتىلدى
سەمەي. KAZINFORM - وبلىستىق بيۋدجەتتەن بولىنگەن 1,5 ميلليارد تەڭگەدەن استام قاراجات ەسەبىنەن جاعالاۋداعى ينفراقۇرىلىم جاڭارتىلىپ جاتىر، دەپ حابارلايدى اباي وبلىسىنىڭ ىشكى ساياسات باسقارماسى.
- الاكول - اباي وبلىسىنىڭ عانا ەمەس، بۇكىل قازاقستاننىڭ تۋريستىك الەۋەتى جوعارى ايماقتارىنىڭ ءبىرى. جاز مەزگىلىندە مىڭداعان دەمالۋشىنى باۋراپ الاتىن كوركەم كول جاعالاۋىندا بيىل كوپتەگەن جاڭاشىل جوبا ىسكە اسىپ جاتىر. ايماق اكىمدىگى مەن ءتيىستى ورگانداردىڭ كەشەندى جۇمىستارى ناتيجەسىندە تۋريستەردىڭ قاۋىپسىز ءارى جايلى دەمالۋىنا جاعداي جاساۋ باستى باسىمدىقتاردىڭ بىرىنە اينالدى، - دەلىنگەن حابارلامادا.
ۆەدومستۆو اتاپ وتكەندەي، وبلىستىق بيۋدجەتتەن بولىنگەن 1,5 ميلليارد تەڭگەدەن استام قاراجات ەسەبىنەن جاعالاۋداعى ينفراقۇرىلىم جاڭارتىلىپ جاتىر.
- اربات ايماعىندا جوندەۋ جۇمىستارى جۇرگىزىلىپ، دەمالىس ايماقتارى مەن ساۋدا ورىندارىن قامتيتىن كەڭىستىك قۇرىلادى. جاعالاۋدىڭ سانيتارلىق جاعدايىن جاقسارتۋ ءۇشىن 25 مودۋلدىك دارەتحانا، 35 كيىنۋ كابيناسى، 50 قوقىس جاشىگى، 86 بەينەباقىلاۋ كامەراسى ورناتىلماق. كول ماڭىنداعى جولداردىڭ ساپاسى دا نازاردان تىس قالعان جوق. جالپى قۇنى 1,09 ميلليارد تەڭگەگە جۋىق سوماعا 21 شاقىرىم جول جوندەلىپ جاتىر. سونىمەن قاتار، قاتتى تۇرمىستىق قالدىقتار پوليگونىنىڭ جوبالىق قۇجاتتاماسى دايىندالىپ جاتىر، - دەلىنگەن باسقارما تاراتقان حابارلامادا.
تۋريستەرگە قولايلى كولىك قاتىناسىن قامتاماسىز ەتۋ ماقساتىندا 2025 -جىلعى ماۋسىمدا الاكول باعىتىنا اۆتو، اۋە جانە تەمىرجول قاتىناستارى ۇيىمداستىرىلادى. «Scat» جانە «وڭتۇستىك اسپان» اۋەكومپانيالارى ارقىلى اپتاسىنا 19 رەيسكە دەيىن ۇشۋ جوسپارلانىپ وتىر. تەمىرجول باعىتىندا «سەمەي - جالاڭاشكول» پويىزى، ال اۆتوكولىكپەن 9 باعىت بويىنشا قاتىناس قامتاماسىز ەتىلەدى.
- قاۋىپسىزدىك - باستى نازاردا. جاعالاۋدا ارنايى وقىتىلعان 10 قۇتقارۋشى، 7 مۇنارا، 7 پيرس جانە بۋيلارمەن جابدىقتالعان 5 شاقىرىم جاعالاۋ شومىلۋ ماۋسىمىندا قاۋىپسىزدىكتى قامتاماسىز ەتەدى. سونىمەن قاتار، تۋريستەرگە 45 پوليتسيا قىزمەتكەرى جانە 14 مەديتسينا قىزمەتكەرى كومەك كورسەتۋگە دايىن. الاكول ماڭىندا «Qazaq Oil» جانارماي بەكەتىنىڭ اشىلۋى - ءوڭىر تۇرعىندارى مەن قوناقتارىنا كورسەتىلگەن تاعى ءبىر ۇلكەن قولداۋ بولدى. الاكول - جايلى دەمالىس، قاۋىپسىز ورتا جانە زاماناۋي ينفراقۇرىلىمنىڭ ۇيلەسىمدى ۇلگىسى، - دەپ تۇيىندەدى باسقارمانىڭ باسپا ءسوز قىزمەتى.
بۇعان دەيىن الاكولگە جازدا 240 مىڭ جولاۋشى تەمىرجول كولىگىمەن تاسىمالداناتىنى ايتىلدى.
