اۋديت: «بايتەرەك» عارىش جۇيەسىنە قاراستىرىلعان 81 ميلليارد تەڭگەنىڭ تورتتەن ءبىرى عانا يگەرىلگەن

استانا. KAZINFORM - جوعارى اۋديتورلىق پالاتا مۇشەسى نۇرلان نۇرجانوۆ ماجىلىستەگى وتىرىستا «بايتەرەك» عارىش جۇيەسىنە بولىنگەن قاراجاتتىڭ جوسپاردى ورىنداۋعا جەتكىلىكسىز بولىپ جاتقانىن باياندادى.

- «بايتەرەك» عارىش جۇيەسىنە قاتىستى ايتساق، ءبىز 5 جىل ساراپتاما جاسادىق. جالپى بۇل جەردەگى ءۇردىس بەكىتىلگەن بيۋدجەتتە قاراستىرىلعان قاراجات بيۋدجەتتى ناقتىلاعان كەزدەردە ازايتۋعا ءجيى ۇشىرايدى. مىسالى، 5 جىلدا 81 ميلليارد تەڭگە قاراستىرىلعانىمەن، سونىڭ 40 ملرد تەڭگەسى عانا قالدىرىلعان. ەندى وسى سومانىڭ تەك 21 ميلليارد تەڭگەسى عانا ورىندالعان. سوندا 81 ميلليارد تەڭگەنىڭ تورتتەن ءبىرى عانا يگەرىلگەن. وسىلايشا 2028 -جىلعا مەجەلەنگەن جوسپاردىڭ ورىندالاتىنىنا كۇمانىمىز بار، - دەدى نۇرلان نۇرجانوۆ.

سونداي-اق، «سامۇرىق-قازىنا» اكسيونەرلىك قورىندا ءجۇرىپ جاتقان اۋديتتىڭ اياقتالاتىن ۋاقىتىن اتادى.

- «سامۇرىق-قازىنا» قورىنا جۇرگىزىپ جاتقان اۋديت شىلدە نەمەسە تامىز ايىندا اياقتالادى. سول كەزدە كەمشىلىكتەرگە جول بەرگەن لاۋازىمدى تۇلعالاردىڭ جاۋاپكەرشىلىگى تۋرالى ۇسىنىمداردى ءتيىستى ورگاندارعا بەرەمىز، - دەدى پالاتا مۇشەسى.

سونداي-اق، ول ۇكىمەت بىلتىر بيۋدجەتتىڭ شىعىس بولىگىن 13 رەت وزگەرتكەنىن اتاپ ءوتتى.

اۆتور

ەسىمجان ناقتىباي