اباي مەكتەبى جاڭا عيماراتقا كوشەدى: قازىرگى مەكتەپ پەن ينتەرنات نە بولادى
الماتى. KAZINFORM - اباي اتىنداعى مەكتەپ-ينتەرنات جاڭا عيماراتقا اۋىسقاننان كەيىن ەسكى عيماراتتىڭ تاعدىرى قانداي بولماق؟ وقۋشىلاردى قابىلداۋ ءتارتىبى مەن ۇستازدار قۇرامى وزگەرە مە؟ Kazinform ءتىلشىسى انىقتاپ كوردى.
بىلتىر قاراشا ايىندا پرەزيدەنت تاپسىرماسىمەن اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتە وقىتاتىن ورتا مەكتەپ-ينتەرناتىنىڭ جاڭا عيماراتىنىڭ قازىعى قاعىلدى.
ال بيىل قاڭتار جاڭا مەكتەپتىڭ قۇرىلىسى باستالدى. اباي اتىنداعى مەكتەپ-ينتەرنات جاڭا عيماراتقا كوشكەننەن كەيىن اباي ۇلتتىق مەكتەبى مارتەبەسىن الماق.
وسى ورايدا، Kazinform ءتىلشىسى وقۋ ورداسىنىڭ قازىرگى عيماراتى مەن قاسىنداعى ەكى جاتاقحانانىڭ بولاشاقتا قانداي ماقساتتا قولدانىلاتىنىن وقۋ-اعارتۋ مينيسترلىگىنەن سۇرادى.
ۆەدومستۆونىڭ جاۋابىنا سايكەس، اباي اتىنداعى رەسپۋبليكالىق مەكتەپ-ينتەرناتتىڭ جاڭا عيماراتى بوستاندىق اۋدانىندا قارقىندى تۇردە سالىنىپ جاتىر. قازىرگى عيماراتى مەدەۋ اۋدانىندا ميتين، 6- مەكەنجايى بويىنشا ورنالاسقان. وقۋ ورداسىنىڭ ۇجىمى عيماراتىنىڭ قۇرىلىسى مەن ىشكى ارلەۋ جۇمىستارى تولىق اياقتالعاننان كەيىن جاڭا نىسانعا تولىعىمەن كوشەدى.
- قازىرگى مەكتەپ-ينتەرناتتىڭ عيماراتى قازاقستان رەسپۋبليكاسى وقۋ-اعارتۋ مينيسترلىگىنىڭ قاراماعىندا قالا بەرەدى. اتالعان نىساندا الداعى ۋاقىتتا پەداگوگيكا جانە پسيحولوگيا باعىتىندا پەداگوگتەر مەن ءبىلىم الۋشىلاردىڭ كاسىبي ءال-اۋقاتىن ارتتىرۋعا جانە قولداۋ كورسەتۋگە ارنالعان جۇمىستاردى ۇيىمداستىرۋ جوسپارلانىپ وتىر، - دەلىنگەن مينيسترلىك جاۋابىندا.
سونىمەن قاتار ۆەدومستۆو مەكتەپ- ينتەرناتىنىڭ جاڭا ميسسياسى مەن دامۋ تۇجىرىمداماسىنىڭ قابىلدانۋىنا بايلانىستى الداعى كەزەڭدە كادرلىق قۇرامعا وزگەرىس ەنۋى مۇمكىن ەكەنىن اتاپ ءوتتى.
ودان بولەك قازىرگى ۋاقىتتا مەكتەپ- ينتەرناتقا 7-سىنىپ وقۋشىلارىن قابىلداۋ ماسەلەسىن مينيسترلىك قاراستىرىپ جاتىر. وسى ۋاقىتقا دەيىن مەكتەپ وقۋشىلاردى 8-سىنىپتان باستاپ ەمتيحان نەگىزىندە قابىلداپ كەلدى.
ەسكە سالايىق، الماتىدا اباي اتىنداعى رەسپۋبليكالىق مەكتەپ- ينتەرناتىنىڭ قۇرىلىسى قاشان اياقتالاتىنىن جازعانبىز.
اۆتور
دوسبول اتاجان
