700 باعدارلاما جابىلادى: قازاقستاندا جوعارى ءبىلىم جۇيەسى جاڭارادى
استانا. KAZINFORM - قازاقستاندا جوعارى ءبىلىم بەرۋ جۇيەسىنە اۋقىمدى وزگەرىستەر ەنگىزىلىپ، وقۋ باعدارلامالارى قايتا قارالادى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك مالىمدەدى.
ءمينيستردىڭ ايتۋىنشا، ءبىلىم بەرۋ ساپاسىن ارتتىرۋ باعىتىندا ناقتى شارالار قولعا الىنعان. سونىڭ ءبىرى - ءبىلىم مازمۇنىن ەڭبەك نارىعىنىڭ سۇرانىسىنا بەيىمدەۋ.
- «جاڭا ماماندىقتار اتلاسى» جوباسى اياقتالدى. ەندى ءار وڭىردە ەڭبەك نارىعىنا قاجەتتى ماماندىقتار ايقىندالدى. سوعان سايكەس 8 مىڭنان استام ءبىلىم بەرۋ باعدارلاماسى قايتا قارالادى. ونىڭ شامامەن 700- ءى جابىلادى، - دەدى ول.
مينيستر بۇل شەشىمدەر ناقتى سۇرانىسقا نەگىزدەلگەنىن اتاپ ءوتتى.
— 73 مىڭعا جۋىق كاسىپورىنعا ساۋالناما جۇرگىزىلدى. سونىڭ ناتيجەسىندە ءار ءوڭىر مەن سالا بويىنشا كادرلارعا دەگەن قاجەتتىلىك انىقتالدى. ەندى ءبىلىم بەرۋ مازمۇنى وسى دەرەكتەرگە سايكەس جاڭارتىلادى، — دەدى ساياسات نۇربەك.
سونىمەن قاتار ينجەنەرلىك ءبىلىم بەرۋ جۇيەسىنە دە وزگەرىستەر ەنگىزىلەدى.
— ينجەنەر مامانداردى دايارلايتىن جوعارى وقۋ ورىندارى پراكتيكالىق وقىتۋعا كوشەدى. مىسالى، اتىراۋ مۇناي جانە گاز ۋنيۆەرسيتەتىندە ستۋدەنتتەر وندىرىستە تاجىريبەدەن ءوتىپ، ناقتى جۇمىس ۇدەرىسىنە قاتىسادى، — دەدى مينيستر.
بۇدان بولەك، شەتەلدىك ۋنيۆەرسيتەت فيليالدارىنا بەرىلەتىن گرانت قۇنى دا قايتا قارالادى.
— بۇل باعىتتا قارجى مينيسترلىگىمەن بىرلەسىپ جۇمىس جۇرگىزىلىپ جاتىر. شەتەلدىك ۋنيۆەرسيتەتتەردىڭ وقۋ قۇنى ءارتۇرلى بولعاندىقتان، بۇل ماسەلە جەكە قاراستىرىلادى. سونىمەن قاتار ولاردىڭ وقىتۋشىلارىنىڭ كەمىندە %30- 40- ى نەگىزگى ۋنيۆەرسيتەتتەن كەلۋى ءتيىس، — دەدى ول.
ءمينيستردىڭ ايتۋىنشا، بارلىق وزگەرىستەر وسى جىلدىڭ ىشىندە قابىلدانىپ، جاڭا وقۋ جىلىنا دەيىن ىسكە اسىرىلادى.
بۇعان دەيىن ءماجىلىس دەپۋتاتى اگرارلىق ماماندىق ستۋدەنتتەرىنىڭ شاكىرتاقىسىن كوتەرۋدى ۇسىنعان ەدى.
