قازاقستان مەن تۇركيا جالپى قۇنى 3,5 ميلليارد دوللاردان اساتىن 35 ينۆەستيتسيالىق جوبانى جۇزەگە اسىرۋدا

 استانا. قازاقپارات - قازاقستان مەن تۇركيا جالپى قۇنى 3,5 ميلليارد دوللاردان اساتىن 35 ينۆەستيتسيالىق جوبانى جۇزەگە اسىرۋدا. بۇل تۋرالى بۇگىن قازاقستان - تۇركيا بيزنەس فورۋمىندا ەلباسى نۇرسۇلتان نازاربايەۆ ءمالىم ەتتى.

 «قازىر ءبىزدىڭ ەلدەرىمىز جالپى قۇنى 3,5 ميلليارد دوللاردان اساتىن 35 ينۆەستيتسيالىق جوبانى بىرلەسىپ جۇزەگە اسىرۋدا. سونىڭ ىشىندە جامبىل وبلىسىندا قۇنى 550 ميلليون دوللار بولاتىن جاڭاتاس جانە شوقپار جەل ەلەكتر ستانساسىنىڭ قۇرىلىسى، اقتوبە وبلىسىنداعى قۇنى 500 ميلليون دوللار بولاتىن حروم كەن بايىتۋ جوباسى، 200 ميلليون تۇراتىن الكوگولسىز سۋسىندار زاۋىتى سالىنىپ جاتىر» ، دەدى ەلباسى.

 مەملەكەت باسشىسى ءوز سوزىندە الەمدە بولىپ جاتقان تۇراقسىزدىق، داعدارىسقا قاراماستان بۇل جوسپارلار ىسكە اسىرىلاتىندىعىن باسا ايتتى. سونىمەن بىرگە بۇگىنگى فورۋم بارىسىندا جاسالعان ءوزارا ىنتىماقتاستىق تۋرالى 17 مەموراندۋمنىڭ قۇنى 1,3 ميلليارد دوللاردان اساتىندىعىن ەسكە سالدى.

«تاعى ءبىر قاتار جوبالار بويىنشا، سونىڭ ىشىندە فارماتسيەۆتيكا، قۇرىلىس ماتەريالدارى، ءوندىرىس سالاسىندا كەلىسسوزدەر جۇرگىزىلىپ جاتىر» ، - دەدى ق ر پرەزيدەنتى.

 

 اۆتور: مارلان جيەمباي