205 «جايلى مەكتەپتىڭ» قۇنى 250 ميلليارد تەڭگەگە قىمباتتاپ شىعا كەلگەن - جوعارى اۋديتورلىق پالاتا

استانا. KAZINFORM - «جايلى مەكتەپ» ۇلتتىق جوباسى اياسىندا سالىنعان 205 مەكتەپتىڭ جالپى قۇنى جوسپارداعى قۇنىنان 250 ميلليارد تەڭگەگە اسىپ تۇسكەن. بۇل تۋرالى جوعارى اۋديتورلىق پالاتا مۇشەسى نۇرلان نۇرجانوۆ ايتتى.

- 2024 -جىلدىڭ قورىتىندىسىندا «جايلى مەكتەپ» ۇلتتىق جوباسىنىڭ 12,8 مىڭ جاڭا وقۋشى ورنىن ەنگىزۋ تۋرالى جوسپارى ورىندالماعان. تالداۋ 205 مەكتەپتىڭ جوبالاۋ-سمەتالىق قۇجاتتاماسىنداعى قۇنى ۇلتتىق جوبانىڭ ەسەپتىك قۇنىنان 250 ميلليارد تەڭگەگە اسىپ تۇسكەن، - دەدى ول.

سونداي-اق، 32 مەكتەپتە قۇرىلىس تولىق اياقتالماسا دا ساباق ءجۇرىپ جاتقان كورىنەدى.

- وقۋ-اعارتۋ مينيسترلىگىنىڭ مالىمەتى بويىنشا، 2024 -جىلعا جوسپارلانعان 111 مەكتەپتىڭ 105- ءىنىڭ قۇرىلىسى اياقتالعانىمەن، ونىڭ تەك 13- ءى عانا پايدالانۋعا بەرىلگەن. جالپى 32 مەكتەپتە نىساندار قابىلدانباسا دا ءبىلىم پروتسەسى جۇرگىزىلىپ جاتىر، - دەدى پالاتا وكىلى.

سونداي-اق، ول ۇكىمەت بىلتىر بيۋدجەتتىڭ شىعىس بولىگىن 13 رەت وزگەرتكەنىن اتاپ ءوتتى.

اۆتور

ەسىمجان ناقتىباي