جۇمىسپەن قامتۋ-2020 جول كارتاسى باعدارلاماسى اياسىندا قامتىلعاندار 460 مىڭ ادامنان استى
«2011-جىلى قابىلدانعان «جۇمىسپەن قامتۋ-2020 جول كارتاسى» باعدارلاماسى جۇمىسسىز، ءوزىن-ءوزى جۇمىسپەن قامتىعان، از قامتىلعان تۇرعىنداردى ناتيجەلى جۇمىسقا تارتۋعا باعىتتالعان. ءوزىن جۇمىسپەن قامتىعان حالىقتىڭ 68 پايىزى اۋىلدا تۇراتىندىعىن ەسكەرسەك، مەملەكەتتىك قولداۋدىڭ شارالارى بۇل جاعدايدى قامتي وتىرىپ نەگىزدەلگەن. 2011-2014-جىلدارى اتالعان باعدارلاما 461 مىڭ ادامدى قامتىدى، ولاردىڭ 60 پايىزى جۇمىسسىزدار، 30 پايىزدان ءسال استامى ءوزىن-ءوزى جۇمىسپەن قامتىعاندار، ال 9 پايىزعا جۋىعى از قامتىلعان تۇرعىندار»، - دەدى ءمينيستردىڭ ورىنباسارى.
وسى ورايدا ول باعدارلاماعا قىتىسۋشىلاردىڭ جارتىسىنان استامى جاستار ەكەنىن اتاپ ءوتتى.
ايتا كەتەيىك، «جۇمىسپەن قامتۋ-2020 جول كارتاسى» باعدارلاماسى اياسىندا جۇمىسپەن قامتۋ ءۇش باعىت بويىنشا ىسكە اسىرىلادى: ينفراقۇرىلىمدى جانە تۇرعىن ءۇي-كوممۋنالدىق شارۋاشىلىقتى دامىتۋ ارقىلى جۇمىسپەن قامتۋ؛ كاسىپكەرلىك باستاماشىلىقتى ىنتالاندىرۋ؛ جۇمىس بەرۋشىلەردىڭ ناقتى سۇرانىسىن ەسكەرە وتىرىپ، وقىتۋ جانە جۇمىسپەن قامتۋ مەن كوشۋگە كومەكتەسۋ.
داۋلەت ارعاندىقوۆتىڭ سوزىنە قاراعاندا، ءبىرىنشى باعىت بويىنشا باعدارلاما ىسكە اسىرىلا باستاعالى اۋىلدىق جەرلەردەگى 4 مىڭنان استام ينفراقۇرىلىمدىق جوبالاردا 55 مىڭ جۇمىس ورنى اشىلدى. ەكىنشى باعىت اياسىندا ازاماتتارعا پايىزدىق مولشەرلەمەسى 6 پايىزدان اسپايتىن، كولەمى 3 ميلليون تەڭگەلىك نەسيەلەر 5 جىل مەرزىمگە بەرىلەدى. 2011-جىلدان بەرى 28 مىڭ ازاماتقا نەسيە بەرىلىپ، ولار ءوز كەزەگىندە 26 مىڭعا تارتا قوسىمشا جۇمىس ورىندارىن اشتى.
ال ءۇشىنشى باعىت بويىنشا باعدارلاما ىسكە اسىرىلا باستاعالى 121 مىڭ ادام كاسىبي وقۋمەن قامتىلىپ، وقۋىن اياقتاعان 105 مىڭ ادامنىڭ 87 پايىزى جۇمىسپەن قامتىلدى. مەملەكەت سۋبسيديالاعان جۇمىس ورىندارىنا 132,5 مىڭ ادام باعىتتالىپ، ولاردىڭ 67 پايىزى تۇراقتى جۇمىسپەن قامتاماسىز ەتىلدى.
اۆتور: رۋسلان عابباسوۆ
