100-دەن استام سپورت تۇرىنە قارجى ءبولۋ قىسقارتىلادى
استانا. KAZINFORM - ەلىمىزدە ءبىرقاتار سپورت ءتۇرىن قارجىلاندىرۋ قىسقارتىلادى. بۇل تۋرالى ق ر تۋريزم جانە سپورت ءمينيسترى ەربول مىرزابوسىنوۆ ءمالىم ەتتى.
بۇگىن ءماجىلىستىڭ جالپى وتىرىسىندا دەپۋتات ەرلان سايروۆ قازاقستاندا سپورتتىڭ 180 ءتۇرى تىركەلگەنىن جانە ونىڭ كوبىسى جايىندا حالىق حابارسىز ەكەنىن ايتتى.
«ترياتل، پەتانك، تەكبول، ۋنيفايت سياقتى ەشكىم بىلمەيتىن سپورت تۇرلەرىن تىركەپ، ونى بيۋدجەتتەن قارجىلاندىرۋدىڭ قاجەتى قانشا؟! ماسەلەن، ۇلى بريتانيادا تەك قانا 15 سپورت ءتۇرى، ال كورشى وزبەكستاندا 17 سپورت ءتۇرى تىركەلگەن، سونداي-اق گەرمانيادا دا 17 سپورت ءتۇرى تىركەلدى. قازاقستاندا 180- ءى تىركەۋدەن وتكەن. ەندى وسى زاڭ اياسىندا سپورت تۇرلەرىنىڭ تاعدىرى قالاي بولادى؟ مىنا ەشكىم بىلمەيتىن سپورت تۇرلەرىنە بيۋدجەتتەن اقشا ءبولۋ توقتاي ما؟»، - دەپ سۇرادى دەپۋتات.
ءوز كەزەگىندە كەيىنگى كەزدە قوعامدا وسى ماسەلە ءجيى كوتەرىلىپ جۇرگەنىن ايتتى.
«ءبىزدىڭ ماقساتىمىز - 180 سپورت ءتۇرىنىڭ ىشىنەن باسىمدىق بەرىلەتىن باعىتتارىن انىقتاۋ. بۇل جۇمىستار بۇگىن ماجىلىستە تالقىلانعان زاڭ جوباسى اياسىندا ەسكەرىلگەن. وليمپيادا، پاراليمپيادا، سۋردليمپيادا، ازيا جانە پارا ازيا ويىندارى باعدارلاماسىنا ەنگىزىلگەن سپورت تۇرلەرى، سونداي-اق ۇلتتىق سپورت تۇرلەرىن باسىمدىق بەرىلەتىن باعىت رەتىندە بەكىتەمىز. وسى ورايدا 60-قا جۋىق سپورت ءتۇرى بولادى. سونىمەن قاتار، مينيسترلىك جاعىنان مونيتورينگ توبى قۇرىلدى جانە ءار ءوڭىر بويىنشا ءتيىستى تالداۋ جۇمىستارى اتقارىلىپ جاتىر. 60 سپورت ءتۇرىن تەك ءبىر وڭىردە دامىتۋ كەرەك دەپ ايتپايمىز، ياعني گەوگرافيالىق ورنالاسۋىنا، مىقتى جاتتىقتىرۋشىلاردىڭ قالىپتاسۋى جاعدايىنا، ينفراقۇرىلىمعا بايلانىستى ءار وڭىرگە باسىم سپورت تۇرلەرىن بەكىتەمىز»، - دەدى مينيستر.
بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق زاڭنامالىق رەگلامەنتتەلۋىن بولدىرماۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
قۇجاتتا ەلىمىزدىڭ سپورت سالاسىندا جاڭا ىرىكتەۋ جۇيەسىن ەنگىزۋ قاراستىرىلعان. زاڭ جوباسىنا سايكەس، باسىم سپورت تۇرلەرى ولاردىڭ الەمدىك رەيتينگتەرى نەگىزىندە ەمەس، وليمپيادا، پاراليمپيادا، سۋردليمپيادا، ازيا ويىندارىندا ۇلتتىق قۇراما كوماندالارىنىڭ كورسەتكەن ناتيجەلەرى بويىنشا ىرىكتەلەتىن بولادى.
اۆتور
رۋسلان عابباسوۆ
