زەينەتتەگى اكادەميكتەرگە ءومىر بويى 60 ايلىق ەسەپتىك كورسەتكىش مولشەرىندە ستيپەنديا تولەنەدى

استانا. KAZINFORM - عىلىم جانە جوعارى ءبىلىم مينيسترلىگى ۇلتتىق عىلىم اكادەمياسىنىڭ زەينەت جاسىنداعى اكادەميكتەرىنە ءومىر بويىنا اي سايىن تولەنەتىن ستيپەنديانىڭ مولشەرىن بەلگىلەۋ جانە تولەۋ قاعيدالارىن رەتتەيتىن قاۋلى جوباسىن كوپشىلىك تالقىلاۋىنا شىعاردى.

«قازاقستان رەسپۋبليكاسى ۇلتتىق عىلىم اكادەمياسىنىڭ زەينەتكەرلىك جاسقا تولعان اكادەميگىنە ءومىر بويعى اي سايىنعى ستيپەنديانىڭ مولشەرى 60 (الپىس) ايلىق ەسەپتىك كورسەتكىش مولشەرىندە بەلگىلەسىن جانە ونى تولەۋ قاعيدالارى بەكىتىلسىن»، - دەپ جازىلعان قاۋلى جوباسىندا.

ستيپەنديا الۋعا ۇمىتكەر اكادەميك ۇلتتىق عىلىم اكادەمياسىنا مىنا قۇجاتتاردى وتكىزۋ كەرەك:

1) ەركىن نىساندا ستيپەنديانى تولەۋگە ءوتىنىش؛
2) ۇعا اكادەميگى مارتەبەسىن راستايتىن قۇجات (ۇعا اكادەميگى مارتەبەسىن بەرۋ تۋرالى ۇعا وتىرىسىنىڭ حاتتاماسىنان ءۇزىندى)؛
3) قازاقستان رەسپۋبليكاسىنىڭ ازاماتتىعىن راستايتىن قۇجات (قازاقستان رەسپۋبليكاسى ازاماتىنىڭ جەكە كۋالىگىنىڭ نەمەسە پاسپورتىنىڭ كوشىرمەسى)؛
4) ەكىنشى دەڭگەيدەگى بانك ايقىندايتىن نىسان بويىنشا شوتتىڭ بولۋى تۋرالى بانك انىقتاماسى.

ستيپەنديا تولەۋ مىنانداي جاعدايلاردا توقتالادى:
1) ۇ ع ا اكادەميگى قايتىس بولسا (قايتىس بولۋ تۋرالى انىقتاما/كۋالىك)؛
2) ۇ ع ا اكادەميگى حابار-وشارسىز كەتسە نەمەسە قايتىس بولدى دەپ جاريالانسا؛
3) ۇ ع ا قۇرامىنان شىعارىلسا (ۇعا ءتورالقاسى وتىرىسىنىڭ حاتتاماسىنان ءۇزىندى)؛
4) قازاقستان رەسپۋبليكاسىنىڭ ازاماتتىعى توقتاتىلسا.

قاۋلى بيىلعى 1-قىركۇيەكتەن باستاپ كۇشىنە ەنەدى.

ۇلتتىق عىلىم اكادەمياسىنىڭ رەسمي سايتىنداعى مالىمەت بويىنشا، ۇ ع ا قۇرامىنداعى 252 مۇشەنىڭ 163 ى اكادەميك، 89 ى كوررەسپوندەنت-مۇشە، 16 سى شەتەلدىك جانە 94 ى قۇرمەتتى مۇشە، 41 ى ۇجىمدىق مۇشە، 6 اۋى - پروفەسسور.

اۆتور
ەسىمجان ناقتىباي