زەينەتاقى قورىنان 200 ميلليارد تەڭگە زاڭسىز شەشىلگەن - قارجىلىق مونيتورينگ اگەنتتىگى
استانا. KAZINFORM - قارجىلىق مونيتورينگ اگەنتتىگى پروكۋراتۋرانىڭ ۇيلەستىرۋىمەن اتىراۋ وبلىسىندا اۋقىمدى جەدەل-تەرگەۋ ءىس-شارالارىن جۇرگىزىپ جاتىر. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.
اگەنتتىكتىڭ اقپاراتىنا سايكەس، «ءبىرىڭعاي جيناقتاۋشى زەينەتاقى قورىنان» قاراجاتتى زاڭسىز شەشۋگە جاردەم كورسەتكەن 5 قىلمىستىق توپتىڭ ارەكەتى اشكەرە بولدى.
ولار ەلدىڭ ءار وڭىرىندە - اتىراۋ، استانا، الماتى، شىمكەنت، اقتاۋ جانە وزگە دە قالالاردا قاعاز جۇزىندە 30-دان استام ستوماتولوگيالىق كلينيكا اشىپ، جالعان قۇجاتتار راسىمدەگەن. الايدا بۇل مەديتسينا ۇيىمدارىنىڭ عيماراتتارى دا، جابدىقتارى دا، بىلىكتى قىزمەتكەرلەرى دە بولماعان. كلينيكا باسشىلارىنىڭ مەديتسينالىق ءبىلىمى دە جوق ەكەنى انىقتالدى.
جالعان مەديتسينالىق قۇجاتتاردى راسىمدەگەنى ءۇشىن كۇدىكتىلەر ازاماتتاردىڭ العان قاراجاتىنان %10- دان %20- عا دەيىن سىياقى ۇستاپ وتىرعان. ال اينالىمنان شىعارىلعان قاراجات كولەمى 200 ميلليارد تەڭگەدەن استى.
قىلمىستىق توپتار اقشانى قولما-قول اقشاعا اينالدىرۋ ءۇشىن 226 «دروپپەردى» پايدالانعان. زەينەتاقى سالىمشىلارىنىڭ ەسەبىنەن كۇدىكتىلەر 600 ميلليون تەڭگەدەن اساتىن 15 قىمبات اۆتوكولىك، سونداي-اق زەرگەرلىك بۇيىمدار، كوممەرتسيالىق نىساندار، پاتەرلەر مەن جەر تەلىمدەرىن ساتىپ العان.
قازىرگى ۋاقىتتا 59 ءتىنتۋ جۇرگىزىلدى، 10 ادامعا قاتىستى بۇلتارتپاۋ شاراسى قولدانىلۋدا. قىلمىستىق جولمەن الىنعان مۇلىكتى ىزدەستىرۋ جالعاسىپ جاتىر.
تەرگەۋ بارىسىندا تەك زاڭسىز سحەما ۇيىمداستىرۋشىلارىنىڭ ارەكەتتەرىنە قۇقىقتىق باعا بەرىلەتىنى اتاپ ءوتىلدى. ءوزىنىڭ جيناقتالعان زەينەتاقى قاراجاتىن العان ازاماتتار قىلمىستىق جاۋاپكەرشىلىككە تارتىلمايدى.
سونىمەن بىرگە ۆەدومستۆو ۇستالعانداردىڭ قورعانۋ قۇقىعى بۇزىلدى دەگەن اقپاراتتى جوققا شىعاردى.
«بارلىق پروتسەسسۋالدىق ارەكەتتەر قولدانىستاعى زاڭناماعا سايكەس جۇرگىزىلۋدە، كۇدىكتىلەردىڭ ادۆوكاتتارىمەن بايلانىسى شەكتەلمەگەن. قما قىزمەتكەرلەرىنىڭ ءىس- ارەكەتىمەن كەلىسپەگەن جاعدايدا ادۆوكاتتار مەن كۇدىكتىلەر سوتقا نەمەسە پروكۋراتۋراعا شاعىمدانا الادى»، - دەپ حابارلادى اگەنتتىك.
اگەنتتىك ب ا ق وكىلدەرىن تەكسەرىلمەگەن مالىمەتتەردى جاريالاماۋعا، تەك رەسمي اقپاراتقا سۇيەنۋگە شاقىردى.
ايتا كەتەيىك، بۇعان دەيىن اتىراۋدا زەينەتاقى قاراجاتىن زاڭسىز اينالدىرۋ دەرەگىنە قاتىستى اۋقىمدى وپەراتسيا باستالعانى حابارلانعان بولاتىن.
