يزرايلدىڭ قارۋ-جاراق شىعاراتىن كومپانياسى فرانسيا ۇكىمەتىن سوتقا بەرمەك
استانا. KAZINFORM - يزرايلدىڭ قورعانىس سالاسىنداعى Rafael كومپانياسى فرانسيا ۇكىمەتىن سوتقا بەرمەك. بۇل شەشىم فرانسيانىڭ لە-بۋرجە قالاسىندا وتكەن حالىقارالىق اۆيا-عارىش كورمەسىندە يزرايلدىڭ بەس كومپانياسى ورنالاستىرىلعان پاۆيلوندارعا كىرۋگە تىيىم سالىنعاننان كەيىن قابىلدانعان، دەپ جازدى Euronews.
فرانسيا بيلىگى مۇنداي شەكتەۋدى كورمەگە قويىلعان شابۋىلدىق قارۋ-جاراق گازا سەكتورىندا قولدانىلۋى مۇمكىن دەگەن ۋاجبەن تۇسىندىرگەن. يزرايلدىك كومپانيا وكىلدەرى بۇل شەشىمگە قاتتى نارازىلىق ءبىلدىرىپ وتىر.
- ءبىز فرانسيا ۇكىمەتىن قارجىلىق شىعىن كەلتىرگەنى جانە جالعا العان مۇلكىمىزگە قولجەتىمدىلىك بەرمەگەنى ءۇشىن سوتقا بەرگەلى وتىرمىز. ەگەر سىزدە زاڭدى تۇردە جالعا الىنعان مۇلىك بولسا، ال بىرەۋ وعان كىرۋگە توسقاۋىل قويسا - بۇل زاڭعا قايشى. سوندىقتان ءبىز بۇل ارەكەتتى ادىلەتسىزدىك دەپ ەسەپتەپ، سوتقا جۇگىنەمىز، - دەدى Rafael كومپانياسىنىڭ اتقارۋشى ۆيتسە-پرەزيدەنتى شلومو توافف.
توافف كورمەنىڭ الدىندا بولعان جايتتاردى بىلاي دەپ باياندادى:
- بۇل پاۆيلوندى ءبىز ءبىر جىل بۇرىن جالعا العانبىز. ستەندتىڭ سىزباسىن بىرنەشە اي بۇرىن فرانسۋز بيلىگىنە جىبەردىك. بارلىق جابدىقپەن كەدەننەن وتتىك - بۇل شامامەن ءبىر اي بۇرىن بولدى. الايدا كورمەنىڭ قارساڭىنداعى تۇندە ولار ەشقانداي رەسمي ەسكەرتۋ جاساماستان ءبىزدىڭ پاۆيلوندى قورشاۋعا الدى، - دەدى ول.
Elbit Systems كومپانياسى دا ءوز ستەندىنىڭ جابىلۋىنا بايلانىستى پاريج بيلىگىن كەمسىتۋشىلىك جاسادى دەپ ايىپتادى.
- مەن قاتتى كوڭىلىم قالدى. ءبىز بۇل كورمەگە كوپ قارجى سالدىق. بۇل شەشىمنىڭ لوگيكاسىن تۇسىنبەي وتىرمىز. ءبىزدىڭ ويىمىزشا، بۇل - كەمسىتۋشىلىك، سەبەبى باسقالار دا ءدال سونداي جۇيەلەردى كورسەتىپ جاتىر، - دەدى Elbit Systems كومپانياسىنىڭ اعا ۆيتسە-پرەزيدەنتى ساسسون مەشار.
ءبىراق فرانسيا پرەمەر-ءمينيسترى ۇكىمەت شەشىمىن قورعاپ وتىر.
- فرانسيانىڭ ديپلوماتيالىق ۇستانىمىن، اسىرەسە گازا سەكتورىنداعى جاعدايعا قاتىستى الاڭداۋشىلىعىن ەسكەرە وتىرىپ، ءبىز مۇنداي كورمەدە شابۋىلدىق قارۋدىڭ بولۋى ورىنسىز ەكەنىن ءبىلدىرۋىمىز قاجەت بولدى، دەدى فرانسيا پرەمەر-ءمينيسترى فرانسۋا بايرۋ.
ايتا كەتەيىك، Rafael ،Elbit جانە IAI - باسقارىلاتىن بومبا مەن زىمىراندار، ال UVision - دروندار شىعارادى.
شلومو توافف كورمە كەزىندەگى تاعى ءبىر جايتتى ايتىپ بەردى:
- بۇگىن تاڭەرتەڭ كورمە قىزمەتكەرى كەلىپ، ەگەر جابدىقتىڭ ءبىر بولىگىن الىپ تاستاماسام، پاۆيلون قابىرعالارىن قۇلاتاتىنىن ايتتى. مەن بۇعان: «ەشتەڭە المايمىن. سىزدەردە شەشىم قابىلداۋعا جەتكىلىكتى ۋاقىت بولدى، ءبىراق ءبارىن تۇندە جاساۋدى تاڭدادىڭىزدار»، - دەپ جاۋاپ بەردىم.
بۇل - يزرايلدىك قارۋ ءوندىرۋشى كومپانيالار فرانسيادا توسقاۋىلعا العاش رەت ۇشىراپ وتىرعان جاعداي ەمەس. بىلتىر ماۋسىمدا ولاردى Eurosatory جەر ءۇستى قارۋ-جاراق كورمەسىنە، ال قاراشادا Euronaval اسكەري-تەڭىز كورمەسىنە قاتىستىرۋدان باس تارتقان. دەگەنمەن سول كەزدە يزرايل بۇل شەشىمدى فرانسيا سوتىندا ءساتتى داۋلاعان بولاتىن.
ەسكە سالا كەتەيىك، بۇعان دەيىن فرانسيانىڭ ستراسبۋرگ قالاسىندا ەۋروپارلامەنتتىڭ كەزەكتى كوشپەلى سەسسياسى بارىسىندا ەۋروكوميسسيا يزرايلگە قارۋ-جاراق جەتكىزبەيتىنىن ايتقان ەدى.
