يزرايل رەسمي تۇردە «سوعىس جاعدايى» رەجيمىن ەنگىزدى

 يزرايل بيلىگى ەلدە «سوعىس جاعدايى» رەجيمىن ەنگىزۋ تۋرالى شەشىم قابىلدادى. بۇل ەندىگى جەردە اۋقىمدى اسكەري وپەراتسيالار جۇرگىزىلەتىنىن بىلدىرەدى. 

Соғыс
Фото: Фото: TPS

بۇل جونىندە ەلدىڭ پرەمەر-ءمينيسترى بينيامين نەتانياحۋدىڭ كانسەليارياسى مالىمدەگەن، دەپ حابارلايدى قازاقپارات تاسس اگەنتتىگىنە سىلتەمە جاساپ.

- يزرايل مەملەكەتىنە قارسى سوعىس كەشە 06:00-دە (سەنبى، 7-قازان، 2023 -جىل) گازا سەكتورىنىڭ قانقۇيلى تەررورلىق شابۋىلدارىنان باستالدى، -دەلىنگەن حابارلامادا.

كانسەلياريانىڭ ناقتىلاۋىنشا، شەشىم «سوعىس جاريالاۋ نەمەسە اۋقىمدى اسكەري ءىس- ارەكەتتەردى باستاۋ» كەزىندە قۇقىقتىق شەڭبەردى ايقىندايتىن «باستى زاڭ: ۇكىمەت» دەپ اتالاتىن قۇجاتتىڭ 40-بابىنىڭ نەگىزىندە مينيسترلەر كابينەتىنىڭ رۇقساتى ارقىلى قابىلداندى.

ەۆرەي حالقىندا بۇل زاڭ كونستيتۋتسيانىڭ ورنىنا جۇرەتىن باستى زاڭداردىڭ ءبىرى سانالادى، سەبەبى بۇل ەلدە ناقتى كونستيتۋتسيانىڭ ءوزى جوق، تەك ورنىنا قولدانىلاتىن نەگىزگى زاڭدار مەن ءتۇرلى قۇقىقتىق قۇجاتتار بار.

ايتا كەتەيىك، كەشە حاماس سودىرلارى يزرايلگە زىمىرانمەن شابۋىل جاساپ، 20 دان استام ادام مەرت بولدى.

ەۋروپالىق وداق حاماستىڭ يزرايلگە شابۋىلىن ايىپتادى.

«ەۋروپالىق وداق شيەلەنىسكەن جاعدايدى ودان سايىن ۋشىقتىرىپ، پالەستينا حالقىنىڭ بەيبىت ومىرگە دەگەن ءۇمىتىن ۇزەتىن ءمان-ماعىناسى جوق شابۋىلدار مەن زورلىق-زومبىلىقتى دەرەۋ توقتاتۋعا شاقىرادى. ەۋروپالىق وداق بۇگىنگىدەي بەي-بەرەكەتسىز، اياۋسىز جاسالعان شابۋىلدار جاعدايىندا ءوزىن حالىقارالىق زاڭدارعا سايكەس قورعاۋعا قۇقى بار يزرايلدى قولدايدى» دەلىنگەن حابارلامادا.

سونداي-اق، «قازاقپارات» اگەنتتىگىنىڭ مەنشىكتى ءتىلشىسى «يزرايل «سوعىس جاعدايىندا»: قازىرگى ساتتەگى احۋال قالاي؟» اتتى ماتەريالىندا كەشەگى جاعدايعا اۋقىمدى شولۋ جاساعان ەدى.

بۇگىن قازاقستاننىڭ تەل-اۆيۆتەگى ەلشىلىگى قازاقستان ازاماتتارىنا يزرايلدە قالىپتاسقان جاعدايعا بايلانىستى ۇندەۋ جاسادى.

«قاۋىپسىزدىك سالاسى بويىنشا جاعدايدىڭ شيەلەنىسۋىنە بايلانىستى قازاقستاننىڭ يزرايلدەگى ەلشىلىگى قازاقستان ازاماتتارىنا (ناقتىراق ايتقاندا ەلدىڭ وڭتۇستىگىندەگىلەرگە) تىلداعى باسشىلىقتىڭ بۇيىرىعىن ورىنداپ، قاۋىپسىز جەرگە تۇراقتاپ، ول جەردەن رەسمي بيلىك وكىلدەرىنىڭ حابارلاۋىنسىز ەشقايدا شىقپاۋعا كەڭەس بەرەدى» دەلىنگەن حابارلامادا.

ودان بولەك، يزرايلدەگى جاعدايعا قاتىستى ق ر سىرتقى ىستەر مينيسترلىگىنىڭ باسپا ءسوز حاتشىسى ايبەك سمادياروۆ پىكىر ءبىلدىردى.

اۆتور

ەربول جانات

سوڭعى جاڭالىقتار