حاماس باس تارتپاعان جاعدايدا تۇگەل قىرىلادى - يزرايل پرەمەر-ءمينيسترىنىڭ جاڭا مالىمدەمەسى

گازا سەكتورىندا يزرايل شابۋىلدارىنان قازا تاپقان پالەستينالىقتاردىڭ سانى 20 مىڭعا جەتتى. وپات بولعانداردىڭ جارتىسىنا جۋىعى - بالالار. قاقتىعىس باستالعانىنا 2 ايدان استى. بۇل رەتتە يزرايل پرەمەر- ءمينيسترىنىڭ جاڭا مالىمدەمەسىندە نە ايتىلدى؟

امين ءال ماسري، رافاح قالاسىنىڭ تۇرعىنى:

- زىمىران سوققىسىنان كەيىن رافاح قالاسىنداعى اۋرۋحانا عيماراتىنىڭ كۇلى كوككە ۇشتى. بىزگە ەش نارسە كورىنبەي قالدى. 3 كۇن بۇرىن كەسار تىلىگى جاسالعان ايەل مەن شاقالاق قىز بالانى وزىممەن بىرگە الىپ ءجۇرىپ، ءۇيىندى استىنان بىرگە امان شىقتىق.

ناۋقاستارعا ورىن جەتپەي جاتىر. ال رافاحتاعى كۋۆەيت اۋرۋحاناسى ناۋقاستارعا لىق تولى. سەبەبى 270 مىڭعا جۋىق تۇرعىنى بار شاھاردا بار بولعانى 2 ءىرى اۋرۋحانا مەن بىرنەشە شاعىن مەديتسينالىق ورتالىق قانا بار. جارالىلار سانى كۇرت كوبەيگەن سوڭ ەم-دومعا ارنالعان مەديتسينالىق جابدىق تا جەتپەي جاتىر.

دجامال حامس، كۋۆەيت مامانداندىرىلعان اۋرۋحاناسىنىڭ ديرەكتورى:

- قاقتىعىسقا دەيىن ءبىز كۇنىنە 100-گە جۋىق ناۋقاستى قابىلداساق، قازىر ولاردىڭ سانى 1000-نان استى. ياعني، 10 ەسە كوپ جۇمىس ىستەۋ كەرەك. الايدا ءبىزدىڭ اۋرۋحانا قىزمەتكەرلەرىنىڭ سانى تەك 40-تان 160 ادامعا دەيىن ءوستى.

دارىگەرلەردىڭ كوز شىرىمىن الۋعا ۋاقىتى جوق. بۇل جاعدايدان جۇقپالى اۋرۋلاردىڭ تارالۋ قاۋپى تۋىنداپ وتىر.

ال يزرايل پرەمەر- ءمينيسترى بەنيامين نەتانياحۋ حاماس توبىنان رايىنان قايتىپ، بەرىلۋدى تاعى تالاپ ەتتى.

بەنيامين نەتانياحۋ، يزرايل پرەمەر- ءمينيسترى:

- ءبىز سوعىستى سوڭىنا دەيىن جالعاستىرامىز. ياعني، حاماس جويىلعانعا دەيىن بەرىسپەيمىز. ءبىز سونداي- اق ولاردىڭ سىبايلاستارىن دا ايامايمىز. حاماس باس تارتپاعان جاعدايدا تۇگەل قىرىلادى! تاڭداۋ وزدەرىندە.

ال حاماس باسپا ءسوز قىزمەتىنىڭ مالىمدەۋىنشە، گازا سەكتورىندا يزرايل شابۋىلدارىنان قازا تاپقان پالەستينالىقتاردىڭ سانى 20 مىڭعا جەتتى. وپات بولعانداردىڭ 8 مىڭعا جۋىعى بالا جانە 6200- ءى - ايەل. 7-قازان كۇنى باستالعان قاقتىعىس سالدارىنان 52 مىڭنان استام ادام جاراقات الىپ، تاعى 6700 تۇرعىن حابار-وشارسىز كەتتى. جالپى العاندا، 310 مەديتسينا، 35 ازاماتتىق قورعانىس قىزمەتكەرى جانە 97 جۋرناليست قازا تاپقان.

اۆتورى: سىمبات مولداتاي

www.24.kz