يزرايل بىتىمگە كەلمەسە، ۇلى بريتانيا پالەستينا مەملەكەتىنىڭ تاۋەلسىزدىگىن مويىندايدى
استانا. KAZINFORM - ۇلى بريتانيا پرەمەر-ءمينيسترى كير ستارمەر ەگەر يزرايل گازا سەكتورىنداعى اتىستى توقتاتۋعا جانە ۇزاقمەرزىمدى بەيبىتشىلىككە باعىتتالعان ناقتى قادامدارعا بارماسا، قىركۇيەك ايىندا پالەستينا مەملەكەتىنىڭ تاۋەلسىزدىگىن مويىندايتىنىن مالىمدەدى، دەپ جازادى euronews.
بۇل تۋرالى ول سەيسەنبى كۇنى جازعى مەزگىل ءۇشىن سيرەك شاقىرىلاتىن ۇكىمەت وتىرىسىندا ايتتى. جيىن گازا سەكتورىنداعى جاعدايدى تالقىلاۋعا ارنالدى.
- ەگەر يزرايل ۇكىمەتى گازاداعى اۋىر جاعدايدى توقتاتۋعا باعىتتالعان ناقتى قادامدارعا بارماسا، اتىستى توقتاتپاسا، باتىس جاعالاۋدى اننەكسيالامايتىنىن اشىق مالىمدەمەسە جانە ەكى مەملەكەت نەگىزىندەگى شەشىمگە اكەلەتىن ۇزاقمەرزىمدى بەيبىت پروتسەستى قولعا الماسا، ۇلى بريتانيا ب ۇ ۇ باس اسسامبلەياسىنا دەيىن پالەستينانى تاۋەلسىز مەملەكەت رەتىندە مويىندايدى، - دەدى ستارمەر مينيسترلەر كابينەتىنىڭ مۇشەلەرىنە.
گازا سەكتورىنداعى جاعداي 21 ايعا سوزىلعان سوعىستىڭ سالدارىنان يزرايلدىڭ ارەكەتتەرىنە حالىقارالىق سىننىڭ كۇشەيۋىنە سەبەپ بولدى. اسىرەسە، اشتىق قاۋپى جايلى ەسكەرتۋلەر مەن السىرەگەن پالەستينالىق بالالاردىڭ سۋرەتتەرى تاراپ، الەمدىك قاۋىمداستىقتىڭ الاڭداۋشىلىعىن تۋعىزدى.
بۇعان دەيىن فرانسيا پالەستينانى مەملەكەت رەتىندە رەسمي تانۋعا شەشىم قابىلدادى. ءبىراق امەريكا قۇراما شتاتتارى فرانسيانىڭ پالەستينانى مەملەكەت رەتىندە تانۋ تۋرالى شەشىمىن قولدامادى.
سونىمەن قاتار نيدەرلاند العاش رەت يزرايلدى ۇلتتىق قاۋىپسىزدىككە قاتەر توندىرەتىن ەل دەپ تانىدى.
