يوردانيالىق شەنەۋنىك تەگەرانعا 20 جىلدان سوڭ ساپارلاپ باردى
استانا. KAZINFORM - جەكسەنبى كۇنى يوردانيانىڭ سىرتقى ىستەر ءمينيسترى ايمان سافادي يرانعا ساپارمەن بارىپ، وڭىردەگى زورلىق-زومبىلىقتى توقتاتۋ جانە ايماقتىڭ بەيبىتشىلىك، قاۋىپسىزدىك ءارى تۇراقتىلىق جاعدايىندا ءومىر سۇرۋىنە مۇمكىندىك بەرۋگە شاقىردى.
بۇل ساپار بارىسىندا تەگەراندا حاماس قوزعالىسى ساياسي بيۋروسىنىڭ باسشىسى يسمايل حانيا مەرت بولعاننان كەيىن وڭىردەگى شيەلەنىستىڭ ۋشىعۋى ماسەلەسى ءسوز بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
يوردانيالىق شەنەۋنىكتىڭ تەگەرانعا 20 جىلداعى العاشقى رەسمي ساپارى
يوردانيانىڭ سىرتقى ىستەر ءمينيسترى جەكسەنبى كۇنى تەگەراندا يران پرەزيدەنتى ماسۋد پەزەشكيانمەن، وسى ەلدىڭ سىرتقى ىستەر ءمينيسترى جانە باسقا دا جوعارى لاۋازىمدى تۇلعالارمەن كەزدەستى. ايمان سافاديدىڭ ساپارى يراندىق ارىپتەسىنىڭ شاقىرۋىمەن ءوتتى.
كورولدىكتىڭ سىرتقى ىستەر مينيسترلىگى جاساعان مالىمدەمەگە قاراعاندا، سافادي يران پرەزيدەنتى پەزەشكيانعا يوردانيا كورولى II ابداللانىڭ وڭىردەگى جاعداي مەن ەكىجاقتى قارىم-قاتىناسقا قاتىستى ۇندەۋىن جەتكىزدى. بۇعان جاۋاپ رەتىندە پەزەشكيان II ابداللاعا ءوزىنىڭ سالەمىن جەتكىزىپ، يوردانيامەن ءارتۇرلى دەڭگەيدە قارىم-قاتىناستى نىعايتۋعا نيەت ءبىلدىردى.
يوردانيا سىرتقى ىستەر مينيسترلىگىنىڭ حابارلاۋىنشا، كەزدەسۋدە وڭىردەگى قاۋىپتى شيەلەنىس پەن حاماس- تىڭ ساياسي جەتەكشىسى يسمايل حانيانىڭ ءولىمىنىڭ سالدارى تالقىلاندى. بۇل تۇرعىدا يوردانيا جاعى ي. حانيانى ءولتىرۋ ارەكەتىن سۇمپايى قىلمىس ەكەنىن ايتىپ، وسى جاعدايدى حالىقارالىق قۇقىقتى بۇزۋ دەپ ايىپتادى.
يران بۇقارالىق اقپارات قۇرالدارىنىڭ جازۋىنشا، كەزدەسۋ كەزىندە ماسۋد پەزەشكيان حانيانىڭ ءولتىرۋ - يزرايلدىك رەجيمنىڭ ۇلكەن قاتەلىگى بولعانىن جانە بۇل وقيعا جاۋاپسىز قالمايتىنىن مالىمدەدى.
سونىمەن قاتار، يوردانيا جاعى بەيرۋتكە قارسى اگرەسسيانى دا ايىپتاپ، ونى ليۆاننىڭ ەگەمەندىگىنە قاتەر ءتوندىرۋ مەن حالىقارالىق قۇقىقتى بۇزۋ دەپ اتادى.
بۇدان بولەك، يران سىرتقى ىستەر ءمينيسترىنىڭ مىندەتىن اتقارۋشى ءالي باگەري قانيمەن كەزدەسۋدە ەكىجاقتى قارىم-قاتىناس پەن وڭىرلىك ماسەلەلەر دە تالقىلاندى.
بۇل كەزدەسۋدەن كەيىن سافادي يران تەلەارناسىنا بەرگەن سۇحباتىندا شيەلەنىستى توقتاتۋ جانە ءوڭىردى سوعىستان قورعاۋعا قاتىستى پىكىر ءبىلدىردى. ونىڭ پايىمىنشا، بۇل تۇرعىدا «يزرايلدىڭ گازا سەكتورىنداعى اگرەسسياسىن، سونداي-اق يزرايلدىڭ ادام قۇقىعى مەن حالىقارالىق قۇقىقتى بۇزۋى ارەكەتىن دەرەۋ توقتاتۋدان» باستالۋى كەرەك.
ايمان سافادي كەيىنگى 20 جىلدان استام ۋاقىت ىشىندە يرانعا رەسمي ساپارمەن بارعان يوردانيالىق ءبىرىنشى جوعارى لاۋازىمدى شەنەۋنىك بولدى. ەگەر يران جاۋاپ قايتارسا، يزرايلمەن شەكارالاس تۇرعان يوردانيا بۇل قاقتىعىستىڭ سالدارىنا تاپ بولۋى مۇمكىن.
سوعىس بولۋى مۇمكىن بە؟
تاياۋ شىعىستاعى شيەلەنىس يزرايل اسكەري اۋە كۇشتەرىنىڭ بەيرۋتكە جاساعان سوققىسىنان ليۆاندىق « حەزبوللا» توبىنىڭ جوعارى لاۋازىمدى اسكەري جەتەكشىسى فۋاد شۋكردىڭ ولىمىنەن كەيىن، سونداي-اق حاماس قوزعالىسى ساياسي بيۋروسىنىڭ باسشىسى يسمايل حانيانىڭ قازاسىنان سوڭ ۋشىعا ءتۇستى.
بۇل رەتتە، حاماس پەن يران جاعى يزرايلدى حانيانى ءولتىردى دەپ ايىپتاپ، كەك الۋعا ۋادە بەردى. حاماس ساياسي بيۋروسى باسشىسىنىڭ ولىمىنە قاتىستى يزرايل رەسمي تۇردە مالىمدەمە جاسامادى.
كەيىنگى كەزدە وڭىردەگى اۋقىمدى سوعىس قاۋپى ارتا ءتۇستى. ەرەكشە شيەلەنىس يزرايلمەن شەكارالاس ليۆاندا بايقالدى. بەيرۋت اۋەجايىنىڭ تەرمينالدارىنا كوپتەگەن جولاۋشى جينالعانى حابارلاندى.
سەنبى كۇنى ا ق ش پەن ۇلى بريتانيا ەلشىلىكتەرى ءوز ازاماتتارىنا ليۆاننان كەتۋگە كەڭەس بەردى، ال فرانسيا جەكسەنبى كۇنى تاڭەرتەڭ بۇل ۇسىنىستارعا قوسىلىپ، ۇندەۋ جاسادى.
بۇدان بۇرىن حابارلانعانداي، يزرايلدىڭ بەيرۋتكە جاساعان سوققىسىنان ءتورت ادام قازا تاپتى.
اۆتور
رۋسلان عابباسوۆ
