يران يزرايل اگەنتى بولۋى مۇمكىن 700 ادامدى ۇستاعانىن حابارلادى

استانا. KAZINFORM - يران بيلىگى جاساعان ءولىم جازالارى مەن جاپپاي تۇتقىنداۋ يزرايلمەن 12 كۇنگە سوزىلعان قاقتىعىس سالدارىنىڭ ءبىرى بولدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

Fars News اگەنتتىگىنىڭ حابارلاۋىنشا، يراننىڭ بارلاۋ قىزمەتى يزرايل مۇددەسى ءۇشىن تىڭشىلىق ارەكەتتەر جاسادى دەگەن كۇدىكپەن 700-گە جۋىق ادامدى ۇستادى.

- جەدەل دەرەكتەر مەن تۇرعىنداردان تۇسكەن حابارلامالار نەگىزىندە بارلاۋ جەلىلەرىنىڭ قۇرامىندا بولعان جالدامالىلار انىقتالىپ، قاماۋعا الىندى، - دەلىنگەن حابارلامادا.

وپەراتسيالار بارىسىندا جارىلعىش زاتتار، قاشىقتان باسقارۋ جۇيەلەرى مەن تىڭشىلىق قۇرىلعىلار تاركىلەنگەنى حابارلاندى. بۇعان قوسا، يراندىق تاراپ يزرايل بارلاۋىمەن بايلانىسى بار درون قۇراستىراتىن جەراستى شەبەرحانالارى تابىلعانىن مالىمدەيدى.

قاۋىپسىزدىك قىزمەتتەرى كەرمانشاح، يسفاحان، حۋزەستان، فارس جانە لورەستان پروۆينتسيالارىندا وپەراتسيا جۇرگىزگەنىن حابارلادى. بۇقارالىق اقپارات قۇرالدارىنىڭ حابارلاۋىنشا، ەل استاناسىندا دا جەكە تۇتقىنداۋلار بولعان، ءبىراق تەگەران بويىنشا رەسمي ستاتيستيكا جاريا ەتىلمەگەن. سونىمەن قاتار باتىس ازەربايجان پروۆينتسياسىنىڭ اكىمشىلىك ورتالىعى ۋرميا قالاسىنىڭ تۇرمەسىندە موسسادپەن ىنتىماقتاسا جۇمىس ىستەگەن ءۇش ادام ءولىم جازاسىنا كەسىلدى.

يدريس ءالي، ازاد شودجاي جانە راسۋل احماد راسۋل قارۋ-جاراق كونترابانداسى جانە يرانداعى جوعارى لاۋازىمدى شەنەۋنىكتى ولتىرۋگە قاتىسى بار دەگەن ايىپتارمەن «جەردەگى جەمقورلىق» جانە «قۇدايعا قارسى سوعىس» ءۇشىن كىنالى دەپ تانىلدى.

- ۇشەۋى دە كورشى ەلدەگى يزرايل بارلاۋ قىزمەتىنىڭ قىزمەتكەرىمەن بايلانىستا بولعان، - دەلىنگەن ءىس ماتەريالىندا.

يزرايلدىڭ ارنايى وپەراتسيالارى

يزرايل قاقتىعىس كەزىندە ارنايى كۇشتەرىنىڭ يراندا ارەكەت ەتكەنىن راستادى.

يزرايل قورعانىس كۇشتەرى (ساحال) باس شتابىنىڭ باسشىسى ەيال زامير يراننىڭ جۇزدەگەن زىمىران تاسىعىشىنىڭ ىستەن شىققانىن جانە سوققىلاردىڭ اۋە كەڭىستىگىن جەدەل باقىلاۋعا مۇمكىندىك بەرگەنىن ايتتى. قاتىسقان بولىمشەلەر تۋرالى مالىمەتتەر جاريالانعان جوق.

يزرايلدىڭ موسساد بارلاۋ قىزمەتى سيرەك جاريالاعان مالىمدەمەسىندە وپەراتسيانى «تاريحي» دەپ اتاپ، امەريكا قۇراما شتاتتارىنا ىنتىماقتاستىعى ءۇشىن العىس ءبىلدىردى، دەپ حابارلايدى The Times of Israel.

اگەنتتىك باسشىسى دەۆيد بارنەا يراندىق قاۋىپ «ايتارلىقتاي بەيتاراپتاندىرىلعانىن» ايتىپ، يراندىق جوبالاردى باقىلاۋدى جالعاستىرۋعا ۋادە بەردى.

تەگەرانداعى مەملەكەتتىك جەرلەۋ راسىمدەرى

يران بيلىگى يسلام رەۆوليۋتسياسى ساقشىلار كورپۋسىنىڭ قولباسشىلارى مەن قاقتىعىس كەزىندە قازا تاپقان عالىمداردى مەملەكەتتىك جەرلەۋ ءراسىمىن جاريالادى. ءراسىم سەنبىگە جوسپارلانعان جانە جوعارى لاۋازىمدى تۇلعالاردىڭ قاتىسۋىمەن تەگەراندا وتەدى.

يراندىق دەرەككوزدەردىڭ حابارلاۋىنشا، سوققىنىڭ ءبىرىنشى كۇنى قازا تاپقان سىقك قولباسشىسى حوسسەين سالاميمەن بولەك قوشتاسۋ ءراسىمى وتەدى. يران اقپارات قۇرالدارى قازا تاپقانداردى «قارسىلىق شەيىتتەرى» دەپ اتاپ، بىرنەشە پروۆينتسيادا جاپپاي ەسكە الۋ شارالارى وتەتىنىن حابارلادى.

يراننىڭ دەنساۋلىق ساقتاۋ مينيسترلىگى 13-25 -ماۋسىم ارالىعىندا يزرايلدىڭ ەلدەگى سوققىلارىنان 627 ادام قازا تاۋىپ، كەمىندە 4870 ادام جارالانعانىن حابارلادى.

مينيسترلىكتىڭ مالىمدەمەسىنە سايكەس، قۇربانداردىڭ %86- ى وقيعا ورنىندا قازا تاپتى، ال تەگەران، كەرمانشاح، حۋزەستان، لورەستان جانە يسفاحان پروۆينتسيالارى ەڭ كوپ زارداپ شەككەن.

سەيسەنبىگە قاراعان ءتۇنى ا ق ش پرەزيدەنتى دونالد ترامپ اتىستى توقتاتۋ تۋرالى كەلىسىمدى جاريالاعاننان كەيىن يران مەن يزرايل اراسىنداعى قاقتىعىستار توقتاتىلدى.

ايتا كەتەيىك، يران پارلامەنتى ماگاتە- مەن ىنتىماقتاستىقتى توقتاتۋ تۋرالى زاڭ جوباسىن ماقۇلدادى.

اۆتور

ەركەجان سماعۇلوۆا