يران پرەزيدەنتى: قارۋلى قاقتىعىستى توقتاتۋدىڭ جالعىز جولى - وق اتۋدى دوعارۋ
ستامبۇل. KAZINFORM - يزرايلدىڭ اگرەسسياسىن توقتاتۋ - يران مەن يزرايل اراسىنداعى قاقتىعىستى اياقتاۋدىڭ جالعىز جولى. بۇل تۋرالى يران پرەزيدەنتى ماسۋد پەزەشكيان مالىمدەدى، دەپ جازدى انادولى.
ونىڭ ايتۋىنشا، يزرايل سونداي-اق اگرەسسيانى قايتالاماۋعا كەپىلدىك بەرۋى ءتيىس.
- ءبىز ءاردايىم بەيبىتشىلىك پەن تۇراقتىلىققا ۇمتىلىپ كەلدىك. الايدا قازىرگى جاعدايدا بۇل بىزگە تاڭىلعان سوعىستى توقتاتۋدىڭ جالعىز جولى - قارسىلاستىڭ اگرەسسيانى تولىق توقتاتۋى جانە سيونيستىك تەرروريستەردىڭ اۆانتيۋراسىنا ءبىرجولا شەك قوياتىن ناقتى كەپىلدىڭ بەرىلۋى، - دەپ جازدى ساياساتكەر الەۋمەتتىك جەلىدە (X پلاتفورماسىندا).
پرەزيدەنت ەگەر بۇل تالاپ ورىندالماسا، يراننىڭ جاۋعا بەرەتىن جاۋابى «قاتاڭ ءارى اۋىر» بولاتىنىن ەسكەرتتى.
قاقتىعىستىڭ ءورشۋى: يزرايلدىڭ سوققىلارى مەن يراننىڭ جاۋابى
2025 -جىلى 13 -ماۋسىمدا يزرايل يراننىڭ ءارتۇرلى قالالارىندا ورنالاسقان يادرولىق نىساندار مەن جوعارعى اسكەري باسشىلىقتىڭ مەكەنجايلارىنا كەڭ اۋقىمدى شابۋىل جاسادى.
اتالعان سوققىلار ناتيجەسىندە يران قارۋلى كۇشتەرى باس شتابىنىڭ باستىعى، يسلام ريەۆوليۋتسياسى ساقشىلار كورپۋسىنىڭ باس قولباسشىسى، بىرنەشە جوعارى لاۋازىمدى اسكەري تۇلعالار جانە يادرولىق زەرتتەۋلەرمەن اينالىسقان توعىز مامان قازا تاپتى.
يران ۇكىمەتىنىڭ مالىمەتى بويىنشا، 585 ادام قازا تاۋىپ، 1300 دەن استام ادام جارالانعان.
جاۋاپ رەتىندە يران يزرايل اۋماعىنا بالليستيكالىق زىمىراندارمەن سوققى بەردى. رەسمي دەرەكتەرگە سۇيەنسەك، بۇل شابۋىل كەزىندە 24 ادام قازا تاپتى، 500-دەن استام ادام جارالاندى.
حالىقارالىق قاۋىمداستىق تاراپىنان، سونىڭ ىشىندە تۇركيا دا، يزرايلدىڭ ارەكەتىن قاتاڭ ايىپتادى.
ەسكە سالا كەتەيىك، بۇعان دەيىن ب ۇ ۇ باس قۇقىق قورعاۋشىسى يران مەن يزرايلدى گۋمانيتارلىق زاڭداردى ساقتاۋعا شاقىرعانىن جازعان ەدىك.
