يران مەن يزرايلدەن 300 دەن استام قازاقستاندىق جەتكىزىلدى
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستان يران مەن يزرايلدە بولعان 300 دەن استام ازاماتىن ەلگە قايتارعانىن ءمالىم ەتتى.
- قازاقستاننىڭ سىرتقى ىستەر مينيسترلىگى مەملەكەتتىك ورگانداردىڭ جانە شەتەلدىك سەرىكتەستەردىڭ قولداۋىمەن يران مەن يزرايلدەن قازاقستان ازاماتتارىن ەۆاكۋاتسيالاۋدىڭ كەزەكتى كەزەڭىن اياقتادى. جالپى، يراننان 233 قازاقستان ازاماتى، ال يزرايلدەن 103 وتانداسىمىز شىعارىلدى، - دەدى ايبەك سمادياروۆ ەلوردادا وتكەن باسپا ءسوز ءماسليحاتىندا.
ونىڭ ايتۋىنشا، مينيسترلىك پەن ەلشىلىكتەر وڭىردەگى جاعدايدى تاۋلىك بويى باقىلاپ، ازاماتتارعا قاجەت كونسۋلدىق قولداۋ كورسەتۋدى جالعاستىرىپ جاتىر.
- الەۋمەتتىك جەلىدە كوپتەگەن سۇراق بولدى. ءبىز بۇل جاعدايدى اۋەجايلاردا كوردىك. مىسالى، دوحا اۋەجايىنا توقتالساق، سول كەزدە قاتاردا شامامەن 45 مىڭ تۋريست شىعا الماي قالدى، ياعني 2-3 كۇن بويى تۇسىنىكسىز جاعداي بولدى. ويتكەنى اۆياكومپانيالاردىڭ ۇشاقتارى ۇشا المادى، اۋە جولدارى جابىق بولدى. سوعان قاراماستان، تىركەۋدە تۇرعان 150 ازاماتىمىز ناعىز «شوۋ» كورسەتە ءبىلدى. ولار «ۇكىمەت قايدا قاراپ وتىر؟ ۇشاقتار قايدا، بىزگە نەگە جاعداي جاسامايدى، بەس جۇلدىزدى قوناق ۇيلەرىمىز قايدا؟» دەپ ءبىراز ابىگەرگە سالدى. بۇل جاعدايدا ادامدار الەمدە نە بولىپ جاتقانىن ءتۇسىنۋى كەرەك قوي؟! ەڭ باستىسى، وسى تالاپتاردان بۇرىن ەلگە امان-ەسەن جەتۋ كەرەك. ال ەلگە كەلگەننەن كەيىن اۋە كومپانياسىنا جانە تۋريستىك كومپانيالارىڭىزعا كەز كەلگەن شاعىم تۇسىرە الاسىز. سول وڭىردەگى احۋالدى جاقسى ءتۇسىنۋ كەرەك! ءبىراق ازاماتتار ءبىزدىڭ ەلشىلىكتى وزدەرىنىڭ شاعىمدارىمەن ءۇيىپ تاستادى، - دەدى رەسمي وكىل.
ءبىر اپتا بۇرىن قازاقستان يران مەن يزرايلدەن 290 نان استام ازاماتىن الدىرعانى ءمالىم بولدى.
