يراننىڭ رۋحاني كوشباسشىسى يزرايلگە تىكەلەي سوققى جاساۋعا بۇيرىق بەردى

استانا. KAZINFORM - يران يزرايل اۋماعىنا سوققى جاساۋعا نيەتتى. ءتيىستى بۇيرىقتى يراننىڭ رۋحاني جەتەكشىسى اياتوللا الي حامەنەي بەردى، دەپ جازادى New York Times.

حامەنەي سارسەنبى كۇنى تاڭەرتەڭ تەگەراندا حاماس باسشىسى يسمايل حانيا ولتىرىلگەننەن كەيىن كوپ ۇزاماي ۇلتتىق قاۋىپسىزدىك كەڭەسىنىڭ شۇعىل جينالىسىندا بۇيرىق بەردى، دەپ حابارلادى باسىلىمعا ەل باسشىلىعىنىڭ ءۇش جوعارى لاۋازىمدى وكىلى، ولاردىڭ ەكەۋى يسلام ريەۆوليۋتسياسىنىڭ ساقشىلار كورپۋسىنىڭ (ك س ي ر) مۇشەلەرى.

يران حانيانىڭ قازاسىنا يزرايلدى ايىپتادى.

«وسى ارەكەتىمەن... سيونيستىك رەجيم اۋىر جازاعا نەگىز دايىندادى»، - دەگەن اياتوللا حامەنەيدىڭ ءسوزىن كەلتىرەدى Irna مەملەكەتتىك اقپارات اگەنتتىگى.

ءوز كەزەگىندە يران پرەزيدەنتى ماسۋد پەزەشكيان X الەۋمەتتىك جەلىسىندە ءوز ەلى «اۋماقتىق تۇتاستىعىن» قورعايتىنىن جانە «تەرروريست باسقىنشىلار ءوز ارەكەتىنە وكىنەتىنىن» جازدى.

بۇعان دەيىن يراننىڭ ب ۇ ۇ- داعى ميسسياسى حاماس جەتەكشىسىنىڭ ءولىمىن جاۋاپسىز قالدىرمايتىنىن مالىمدەگەن ەدى. ال شابۋىلدى يزرايل جاسادى دەپ ايىپتادى. ءبىراق يزرايل تاراپى ازىرگە ەشقانداي تۇسىنىكتەمە بەرگەن جوق. ءوز كەزەگىندە ەۋرووداق پەن ا ق ش ديپلوماتتارى احۋالدىڭ شيەلەنىسىپ كەتۋىنە جول بەرمەۋ ماقساتىندا شۇعىل وتىرىس وتكىزدى. كەزدەسۋدە يراندى يزرايلگە شابۋىل جاساماۋعا كوندىرۋ جاعى تالقىلانعان.

ەستەرىڭىزگە سالا كەتەيىك، كەشە حاماس- تىڭ تەگەرانداعى رەزيدەنسياسىنا اۋەدەن شابۋىل جاسالىپ، يسمايل حانيا مەن ونىڭ وققاعارى قازا تاپتى.

اۆتور

ەركەجان سماعۇلوۆا