يراك ەلەكەيەۆ استانانى سالعان قۇرىلىسشىلارعا ەسكەرتكىش ورناتۋدى ۇسىندى
استانا. KAZINFORM - استانا قالاسى قوعامدىق كەڭەسىنىڭ مۇشەسى، قالالىق كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەسىنىڭ ءتوراعاسى يراك ەلەكەيەۆ استانا سالعان قۇرىلىسشىلارعا ارناپ ەسكەرتكىش سالۋدى ۇسىندى.

- ارامىزدا ىشكى ساياسات باسقارماسىنىڭ وكىلدەرى وتىر ەكەن. استانانى سالعان قۇرىلىسشىلار. استانانى سالامىز دەپ ءجۇرىپ ولگەن دە، جاراقات العان دا سولار. ءبىز سولاردىڭ ەڭبەگىن دۇرىستاپ باعالادىق پا؟
استانا اۋماعىندا قۇرىلىسشىلارعا ارنالعان ءبىر ەسكەرتكىش بار ما وسى، ايتىڭىزدارشى ماعان؟ استانانى قالتالىلار ەمەس، قۇرىلىسشىلار سالعان، - دەدى يراك ەلەكەيەۆ قوعامدىق كەڭەس وتىرىسىندا.
قوعامدىق كەڭەس مۇشەسى جۇمىسشى ماماندىقتار جىلىندا وسى ولقىلىقتىڭ ورنىن تولتىرۋ كەرەك دەگەن وي ايتتى.
- ءبىز سوۆەت ۇكىمەتىن جاماندايمىز. ال ول كەزدە ۇزدىك سىلاقشىلار، مونتاج ماماندارى بۇكىل وداققا تانىمال بولاتىن. ال قازىر بىزدە قالتاسىن تولتىرىپ العاندار تانىمال. وسى جاعىنا نەگە ءمان بەرمەيمىز. استانانى سالعان قۇرىلىسشىلارعا دۇرىستاپ ءبىر جاقسى ەسكەرتكىش قويسا دۇرىس بولار ەدى. وسىنداي ۇسىنىسىم بار، - دەدى زاڭگەر.
ەسكە سالساق، 2025-جىل جۇمىسشى ماماندىقتارىنىڭ جىلى بولىپ بەكىتىلگەن ەدى.