ينۆەستيتسيالىق جوبالاردى «جاسىل ءدالىز» تەتىگىنە ەنگىزۋ كريتەريلەرى قارالدى
استانا. KAZINFORM – ق ر پرەمەر-ءمينيسترىنىڭ ءبىرىنشى ورىنباسارى رومان سكلياردىڭ توراعالىعىمەن ينۆەستيتسيا تارتۋ جونىندەگى كەڭەستىڭ كەزەكتى وتىرىسى ءوتتى.
تالقىلاۋ شەڭبەرىندە ينۆەستيتسيالىق جوبالاردى «جاسىل ءدالىز» تەتىگىنە ەنگىزۋ كريتەريلەرى قارالدى. اتالعان كريتەريلەر اشىقتىقتى ارتتىرۋعا جانە ينۆەستورلاردىڭ اتقارۋشى بيلىك ورگاندارىمەن ءوزارا ءىس- قيمىلىن جەڭىلدەتۋگە باعىتتالعان.
جيىن بارىسىندا ينۆەستيتسيالار تۋرالى كەلىسىمنىڭ تەتىگىن جاقسارتۋعا ەرەكشە نازار اۋدارىلدى. ۇسىنىلعان تەتىك وتىنىمدەردى قاراۋ ۋاقىتىن 12 ايدان 3 ايعا دەيىن قىسقارتۋعا جانە راسىمدەردى جەڭىلدەتۋگە باعىتتالعان، بۇل ينۆەستيتسيالار سالاسىندا نەعۇرلىم ءتيىمدى جۇمىس ىستەۋگە ىقپال ەتەدى.
سونىمەن قاتار اۆتوجول قۇرىلىسى سالاسىنا ينۆەستيتسيا تارتۋ ماسەلەسى قارالدى. جالپى، ينۆەستيتسيالىق ماسشتابتا بەكىتىلگەن شارالار وتاندىق كومپانيالاردىڭ باسەكەگە قابىلەتتىلىگىن ارتتىرادى جانە ولاردى ءىرى اۆتوجول جوبالارىن ىسكە اسىرۋعا تارتۋعا مۇمكىندىك بەرەدى.
سونداي-اق وتىرىستا قاتتى تۇرمىستىق قالدىقتاردى ەنەرگەتيكالىق كادەگە جاراتۋدى ودان ءارى دامىتۋ ماسەلەسى تالقىلاندى. بۇل سالا ينۆەستيتسيا تارتۋ ءۇشىن پەرسپەكتيۆالى سالالاردىڭ ءبىرى سانالادى.
وتىرىس شەڭبەرىندە فارماتسيەۆتيكا جانە قاتتى تۇرمىستىق قالدىقتار سالاسىنداعى جەكەلەگەن ينۆەستيتسيالىق جوبالاردىڭ پروبلەمالىق ماسەلەلەرى كوتەرىلدى.
وڭىرلىك دەڭگەيدە قاراعاندى وبلىسى اكىمدىگىنىڭ ينۆەستيتسيا تارتۋ جونىندەگى قىزمەتى قارالدى. وڭىردە 12 مىڭنان استام جۇمىس ورنىن قۇرا وتىرىپ، 50 ينۆەستيتسيالىق جوبادان تۇراتىن پۋل قالىپتاستىرىلدى.
وتىرىس قورىتىندىسىنا سايكەس، جاۋاپتى مەملەكەتتىك ورگاندارعا ينۆەستيتسيا تارتۋ جونىندەگى كەڭەستىڭ ەرەكشە باقىلاۋىندا بولاتىن تاپسىرمالار بەرىلدى.
