ينۆەستورلاردىڭ جۇمىس ورىندارىن قۇرۋعا قاتىستى جاۋاپكەرشىلىگىن ارتتىرۋ كەرەك - ۇكىمەت

استانا. KAZINFORM - جاس مامانداردى جۇمىسقا ورنالاستىرۋعا باسا نازار اۋدارۋ كەرەك. بۇل تۋرالى بۇگىن ۇكىمەت وتىرىسىندا پرەمەر-مينيستر ولجاس بەكتەنوۆ ءمالىم ەتتى.

- جۇمىس ورىندارىن قۇرۋدىڭ ساپالى مونيتورينگىن قامتاماسىز ەتۋ ءۇشىن يننوۆاتسيالىق جوبالار ناۆيگاتورى ازىرلەندى. اقپاراتتىق جۇيە جاڭا جۇمىس ورىندارىنىڭ سانىن، ولاردىڭ ەڭبەك نارىعىنىڭ قاجەتتىلىكتەرىنە سايكەستىگىن، سونداي-اق جۇمىس بەرۋشىلەردىڭ جۇمىسپەن قامتۋ جوسپارلارىنىڭ ورىندالۋىن قاداعالايدى. شەتەلدىك جانە وتاندىق ينۆەستورلاردىڭ جاڭا جۇمىس ورىندارىن قۇرۋ بويىنشا ءوز مىندەتتەمەلەرىن ورىنداۋ باعىتىنداعى جاۋاپكەرشىلىگىن ارتتىرۋ كەرەك. سونداي-اق ينۆەستيتسيا كولەمىنىڭ ەڭ كەمى 30 پايىزىن قۇرايتىن ەڭبەكاقى تولەۋ قورىن قالىپتاستىرۋ تالابىن ساقتاۋ قاجەت. ناۆيگاتوردا سالالار بويىنشا ءىرى ينۆەستيتسيالىق جوبالار عانا كورىنىس تاپقان، - دەدى ولجاس بەكتەنوۆ.

ونىڭ ايتۋىنشا، جاڭا جۇمىس ورىندارىنا ناقتى ۋاقىت رەجيمىندە تولىق ءارى جۇيەلى تۇردە مونيتورينگ جۇرگىزۋ ءۇشىن ءبىرىڭعاي اقپاراتتىق جۇيە قاجەت. ول ەلىمىزدە ىسكە اسىرىلىپ جاتقان جوبالار تۋرالى بارلىق اقپاراتتى، سونىڭ ىشىندە بىلىكتىلىك دەڭگەيىن، ەڭبەك جاعدايلارىن، جالاقى مولشەرىن جانە باسقا دا دەرەكتەردى قاداعالاپ وتىرۋعا ءتيىس.

- سونىمەن قاتار ەلىمىزدە اشىلاتىن جۇمىس ورىندارىنىڭ ءبىر بولىگى - ۋاقىتشا جۇمىسپەن بايلانىستى. مۇنداي ءتاسىلدىڭ تيىمدىلىگى تومەن. سوندىقتان قولدانىستاعى جوسپارلاردا تۇراقتى جۇمىسپەن قامتۋ ۇلەسىن ۇلعايتۋ قاجەت. اسىرەسە، جاس مامانداردى جۇمىسقا ورنالاستىرۋعا باسا نازار اۋدارۋ كەرەك. اتالعان ماسەلەلەردى كەشەندى تۇردە شەشۋگە باعىتتالعان شارالار ەڭبەك نارىعىن دامىتۋ تۇجىرىمداماسىندا كوزدەلگەن، - دەدى ۇكىمەت باسشىسى.