ەگىندى ەرتەرەك باستاۋ كەرەك - مينيستر قۇرعاقشىلىق بولۋى مۇمكىن وڭىرلەردى اتادى

استانا. KAZINFORM - ەكولوگيا جانە تابيعي رەسۋرستار ءمينيسترى ەرلان نىسانبايەۆ اۋا رايى بولجامدارىن بايانداپ، قۇرعاقشىلىق بولۋى مۇمكىن وڭىرلەردى اتادى جانە ەگىن ەگۋ جۇمىستارىن ەرتەرەك باستاۋدى ۇسىندى.

ءمينيستردىڭ ايتۋىنشا، بيىل ەلدىڭ كوپ بولىگىندە قىس جىلى جانە قارلى بولىپ، توپىراقتىڭ جاقسى ىلعالدانۋىنا اسەر ەتتى.

− ەلدىڭ سولتۇستىگى مەن ورتالىعىنىڭ ەگىس القاپتارىندا ىلعال قورى نەگىزىنەن قاناعاتتانارلىق جانە وڭتايلى. الايدا، ساۋىردەگى ىستىق اۋا رايىندا ىلعال تەز بۋلاندى. ەندى ەگىس كەزىندە باتىس قازاقستان وبلىسىندا توپىراق ىلعالى جەتىسپەۋى مۇمكىن. استىق ەگەتىن ايماقتاردا ەگىن ەگۋ جۇمىستارىن مەرزىمنەن ەرتەرەك جۇرگىزۋدى ۇسىنامىز، − دەدى ە. نىسانبايەۆ بۇگىنگى ۇكىمەت وتىرىسىندا.

مامىر ايى ەلدىڭ كوپ بولىگىندە ىستىق جانە قۇرعاق بولادى دەپ كۇتىلۋدە، الايدا استىق ەگەتىن وڭىرلەردە، تاۋ بوكتەرىندە جانە وڭتۇستىكتە جاۋىن- شاشىن كولەمى كليماتتىق نورماعا جاقىن مولشەردە بولادى دەپ بولجانىپ وتىر.

سونداي-اق، مامىردا قوستاناي وبلىسىنىڭ وڭتۇستىگىندە، باتىس قازاقستان جانە ماڭعىستاۋ وبلىستارىنىڭ وڭتۇستىك- باتىس بولىگىندە، قىزىلوردا وبلىسىنىڭ سولتۇستىك- باتىسىندا، الماتى جانە جامبىل وبلىستارىنىڭ سولتۇستىگىندە، قاراعاندى وبلىسىنىڭ وڭتۇستىگىندە، سونداي- اق اقتوبە، اتىراۋ، اباي جانە تۇركىستان وبلىستارىنىڭ جەكەلەگەن اۋداندارىندا قۇرعاقشىلىق بولۋى مۇمكىن.

− ماۋسىم ايىندا قازاقستاننىڭ باسىم بولىگىندە ايلىق ورتاشا اۋا تەمپەراتۋراسى قالىپتى بولادى، ياعني ەلدىڭ سولتۇستىگى مەن ورتالىعىندا 17-20 گرادۋس، ال باتىسىندا - 23-25 گرادۋس بولادى دەپ كۇتىلەدى. وڭتۇستىك- باتىستا جانە وڭتۇستىكتە ادەتتەگىدەن ىستىعىراق بولادى، جازىق بولىكتە ورتاشا تەمپەراتۋرا 24-28 گرادۋس، ال ماكسيمالدى تەمپەراتۋرا - 45 گرادۋسقا دەيىن جەتەدى. ەلدىڭ باتىسىندا جانە سولتۇستىك- شىعىسىندا، شىعىسىندا جانە وڭتۇستىگىندە جاۋىن- شاشىن نورما شەگىندە، ال قالعان اۋماقتا كوبىنەسە نورمادان از بولادى، − دەدى ەكولوگيا ءمينيسترى.

جاۋىن- شاشىن نەگىزىنەن كوپجىلدىق نورمالار شەگىندە بولجانادى، سولتۇستىك- باتىستا، سولتۇستىكتە، وڭتۇستىكتە جانە وڭتۇستىك- شىعىستا جاۋىن- شاشىن نورمادان جوعارى بولادى دەپ بولجانعان.

− تامىز، قىركۇيەك ايلارى ەگىننىڭ ءپىسۋى مەن ونى جيناۋ جۇمىستارىنا قولايلى بولادى دەپ كۇتىلۋدە. مول جانە ۇزاققا سوزىلاتىن جاۋىن- شاشىن كۇتىلمەيدى، ەلدىڭ باسىم بولىگىندە ايلىق ورتاشا اۋا تەمپەراتۋراسى كليماتتىق نورمادان 1 گرادۋسقا جوعارى بولادى، − دەدى ەرلان نىسانبايەۆ.

ايتا كەتەيىك، ەنەرگەتيكا مينيسترلىگى بيىلعى ەگىس ناۋقانىنا 401 مىڭ توننا ارزانداتىلعان ديزەل وتىنىن ءبولدى. شارۋالار ءۇشىن تۇپكىلىكتى باعا ليترىنە 254 تەڭگەگە بەرىلەدى، بۇل نارىقتان %20 عا ارزان.

اۆتور

ايجان سەرىكجان قىزى