يەمەن جاعالاۋىندا ورتەنگەن الىپ تانكەردەن مۇناي توگىلمەۋى ءۇشىن ارنايى وپەراتسيا باستالدى

استانا. KAZINFORM - قىزىل تەڭىزدە يەمەندىك حۋسيت كوتەرىلىسشىلەرى شابۋىل جاساعان تانكەردەن ميلليون باررەلگە جۋىق مۇنايدىڭ توگىلۋىنە جول بەرمەۋ وپەراتسياسى ءجۇرىپ جاتىر.

21 -تامىزدا شابۋىل جاسالعاننان كەيىن ءبارى ومان جاعالاۋىنداعى گرەكەيا تۋى بار MV Sounion تانكەرىن تاستاپ كەتكەن.

گرەك كەمەسى ارتيللەريا وقتارى مەن بەلگىسىز سناريادتارعا ۇشىراعانىن وتكەن اپتادا قىزىل تەڭىزدەگى، ادەن شىعاناعىنداعى جانە اراب تەڭىزىندەگى ساۋدا كەمەلەرى اراسىندا اقپارات الماسۋ جونىندەگى بريتاندىق باستاماسى UKMTO حابارلادى.

25 ەكيپاج مۇشەسىن ەۋروپالىق اسكەري كەمە قۇتقاردى.

كەيىنىرەك حۋسيتتەر جاريالاعان ۆيدەودان ولاردىڭ تانكەرگە ءتۇسىپ، پالۋبانى بىرنەشە جەردەن ورتەپ جىبەرگەنى بەلگىلى بولدى. حۋسيت كوشباسشىسى مۇنى باتىل شابۋىل دەپ اتادى.

دۇيسەنبى كۇنى قۇتقارۋ وپەراتسياسىنىڭ قاۋىپسىزدىگىن قامتاماسىز ەتەتىن ەۋرووداق اسكەرلەرى كەمە ءالى دە ورتەنىپ جاتقانىن مالىمدەدى.

ساراپشىلار ءورت تەز ارادا اۋىزدىقتالماسا، تاريحتا بۇرىن-سوڭدى بولماعان مۇناي توگىلۋى بولاتىنىن ەسكەرتەدى.

ا ق ش مەملەكەتتىك دەپارتامەنتى بۇعان دەيىن MV Sounion تانكەرىنەن مۇناي توگىلۋى 1989 -جىلعى الياسكا جاعالاۋىندا قۇلاعان Exxon Valdez تانكەرىنىڭ اپاتىنان ءتورت ەسە كوپ بولۋى مۇمكىن دەپ ەسكەرتتى.

ول كەزدە 2100 ك م جاعالاۋ سىزىعى لاستانعان.

سوڭعى 10 ايدا حۋسيتتەر قىزىل تەڭىزدەگى بىرنەشە شەتەلدىك كەمەلەرگە شابۋىل جاسادى. يران قولدايتىن توپ ءوز ارەكەتتەرىن حاماس-قا قولداۋ كورسەتۋ دەپ تۇسىندىرەدى.

اۆتور

ەركەجان سماعۇلوۆا