ىشكى ىستەر مينيسترلىگى اۋا رايىنا بايلانىستى كولىك تىزگىندەگەن جۇرگىزۋشىلەرگە ۇندەۋ جاسادى

استانا. KAZINFORM - ىشكى ىستەر مينيسترلىگى جول جۇرىسىنە قاتىسۋشىلارعا ۇندەۋ جاسادى. بۇل تۋرالى ۆەدومستۆونىڭ باسپا ءسوز قىزمەتى ءمالىم ەتتى.

- قۇرمەتتى جول جۇرىسىنە قاتىسۋشىلار! كۇزدىڭ باستالۋىمەن ۇساق جول-كولىك وقيعالارىنىڭ بولۋ قاۋپى ارتادى. اۋا-رايىنىڭ وزگەرۋى جول جۇرىسىنە قاتىسۋشىلار ءۇشىن قولايسىزدىق تۋدىرادى. جاڭبىر كورىنۋدى ازايتىپ، دوڭگەلەكتەردىڭ سىرعاناۋىنا اكەلۋى مۇمكىن. جينالعان سۋدىڭ كەسىرىنەن اسفالتتاعى كەدىر- بۇدىرلار مەن شۇڭقىرلار كورىنبەي، جول قاۋىپسىزدىگىنە كەرى اسەرىن تيگىزەدى. وسىعان بايلانىستى جۇرگىزۋشىلەردى مۇقيات بولۋعا شاقىرامىز. قاراڭعى ۋاقىتتا جارىق قۇرىلعىلارىنىڭ دۇرىستىعىن قاداعالاپ، جارىقتاندىرىلعان جولداردى تاڭداڭىز. كەنەتتەن كەدەرگىلەر پايدا بولعان كەزدە توقتاۋعا مۇمكىندىك بەرەتىن جىلدامدىقتى تاڭداڭىز. كۇزدە تەمپەراتۋرانىڭ وزگەرۋىنە بايلانىستى جولدا، اسىرەسە كوپىرلەر مەن وتكەلدەردە مۇز پايدا بولۋى مۇمكىن. جولعا باسا نازار اۋدارىڭىز، كولىك جۇرگىزۋ كەزىندە تەلەفون پايدالانباڭىز جانە كولىك باسقارۋدان الاڭداتاتىن ارەكەتتەردەن اۋلاق بولىڭىز.

جول ءجۇرىسى قاعيدالارىن، جىلدامدىق رەجيمىن جانە قاشىقتىقتى ساقتاڭىز، جىلدام ءجۇرىس پەن باسىپ وزۋدان اۋلاق بولىڭىز، جاياۋ جۇرگىنشىلەردى نازاردان تىس قالدىرماي، اينالاڭىزداعى جول جاعدايىن باقىلاۋدا ۇستاڭىز. اۆتوكولىك يەلەرىنە اۋا-رايىنىڭ وزگەرۋىن مۇقيات قاداعالاپ، ناشارلاعان جاعدايدا ەلدى مەكەندەردەن تىس جەرلەرگە شىعۋدى شەكتەۋ ۇسىنىلادى. جاياۋ جۇرگىنشىلەر اۋا-رايىنىڭ قولايسىزدىعىمەن اۆتوكولىكتىڭ تەز توقتاي المايتىنىن ەستە ۇستاۋى كەرەك. كوشەدەن وتپەس بۇرىن سىزگە جول بەرگەنىنە كوز جەتكىزىڭىز، سودان كەيىن عانا ءجۇرىستى جالعاستىرىڭىز. ىشكى ىستەر ورگاندارىنىڭ جەكە قۇرامىنا قيىن جاعدايعا تاپ بولعانداردىڭ بارلىعىنا كومەك كورسەتۋ تاپسىرىلدى. بارشاڭىزعا قاۋىپسىز جول تىلەيمىز! - دەدى ءى ءى م اكىمشىلىك پوليتسيا كوميتەتىنىڭ ەرەكشە تاپسىرمالار جونىندەگى اعا ينسپەكتورى اقتوتى بورانوۆا.