دينارا زاكيەۆا: «ادىلەت» پارتياسىنىڭ جارعىسى مەن باعدارلاماسى قوعام تالقىسىنان ءوتتى

بۇل تۋرالى ساياسي كەڭەس قۇرامىنىڭ مۇشەسى، بالا قۇقىقتارى جونىندەگى ۋاكىل دينارا زاكيەۆا مالىمدەدى.

ونىڭ ايتۋىنشا، پارتيا باعدارلاماسى ۇيىمنىڭ نەگىزگى يدەيالىق ۇستانىمدارىن ايقىندايدى. قۇجاتتا ادىلەتتىلىك، پاتريوتيزم، جاۋاپكەرشىلىك، ەڭبەكقورلىق جانە پروگرەسس باستى قۇندىلىقتار رەتىندە بەلگىلەنگەن.

- قۇجاتتار ءتيىستى قۇقىقتىق ساراپتامادان ءوتىپ، بەكىتۋگە دايىن. جارعى مەن باعدارلاما جوبالارى پارتيانىڭ رەسمي سايتىندا جاريالانىپ، قوعام تالقىسىنا ۇسىنىلدى. ناتيجەسىندە ازاماتتاردان كوپتەگەن پىكىر مەن ۇسىنىس كەلىپ ءتۇستى، - دەدى دينارا زاكيەۆا.

سونداي-اق ول قۇجاتتاردى جان-جاقتى تالقىلاۋ ماقساتىندا ءبىرقاتار ستراتەگيالىق سەسسيا ۇيىمداستىرىلعانىن ايتتى.

- ءبىز بارلىق وڭىردەن، ءتۇرلى سالا مەن ۇيىمنان كەلگەن دەلەگاتتارمەن پىكىر الماستىق. تۇسكەن ۇسىنىستار مەن ۇسىنىمدار ەسكەرىلىپ، پارتيانىڭ الداعى باعدارلامالىق قۇجاتتارىن ازىرلەۋ بارىسىندا پايدالانىلاتىن بولادى. ەڭ باستىسى، ورتاق تالقىلاۋلار ارىپتەستەرىمىز بەن دەلەگاتتاردىڭ قۇندىلىقتارى مەن بولاشاققا دەگەن كوزقاراسى ءبىر ەكەنىن كورسەتتى. بۇل باعىتتاعى جۇمىس الداعى ۋاقىتتا دا جالعاسادى، - دەدى ول.

ساياسي كەڭەس قۇرامى مۇشەسىنىڭ ايتۋىنشا، پارتيا جارعىسىندا ۇيىمنىڭ قۇقىقتىق مارتەبەسى، ماقسات- مىندەتتەرى، قۇرىلىمى، مۇشەلەرىنىڭ قۇقىقتارى مەن مىندەتتەرى، سونداي-اق باسقارۋ جانە باقىلاۋ ءتارتىبى ناقتى ايقىندالعان.