ي ك ا و قازاقستاننىڭ اقتاۋ ماڭىنداعى ۇشاق اپاتىن تەرگەۋ بويىنشا ەسەبىن جوعارى باعالادى

استانا. KAZINFORM - ۆيتسە-پرەمەر قانات بوزىمبايەۆ ي ك ا و ەۋروپالىق جانە سولتۇستىك اتلانتيكالىق بيۋروسىنىڭ ديرەكتورى نيكوليا راللومەن كەزدەستى.

قانات بوزىمبايەۆ ي ك ا و- عا قازاقستانمەن ىنتىماقتاستىق ماسەلەسىندە تۇراقتى قولداۋ ءبىلدىرىپ كەلە جاتقانىنا ريزاشىلىق تانىتىپ، Azerbaijan Airlines اۋە كەمەسى اپاتقا ۇشىراعان جەرگە تاۋەلسىز ساراپشى تورمودۋرا تورمودسسوندى دەر ۋاقىتىندا جىبەرگەنى ءۇشىن العىس ايتتى.

- ۇكىمەت اتىنان بىزگە كورسەتكەن تۇراقتى قولداۋىڭىز، ونىڭ ىشىندە باستامالارىمىزعا قولداۋىڭىز ءۇشىن سىزگە شىنايى ريزاشىلىعىمدى بىلدىرەمىن. اتالعان تەرگەۋدى تولىقتاي اياقتاۋ ءۇشىن ي ك ا و- مەن ءوزارا ءىس-قيمىلدى جالعاستىرامىز، - دەدى ۇكىمەت باسشىسىنىڭ ورىنباسارى.

ۆيتسە-پرەمەر اۋە كەمەسى اپاتقا ۇشىراعان ءبىرىنشى كۇننەن باستاپ قازاقستان اتالعان وقيعانى شىنايى جانە ەگجەي-تەگجەيلى تەرگەۋدى ماقسات تۇتقانىن باسا ايتتى.

نيكوليا راللو ءوز كەزەگىندە قازاقستاننىڭ قىسقا عانا ۋاقىتتىڭ ىشىندە «Azerbaijan Airlines» اۋە كومپانياسى ۇشاعىنىڭ اپاتىن تەرگەۋ بويىنشا جۇرگىزگەن جانە جاريالاعان الدىن الا ەسەبىن جوعارى باعالادى.

- قازاقستان مەن تەرگەۋ جونىندەگى بارلىق كوميسسيانى ولاردىڭ كۇش-جىگەرى ءۇشىن اتاپ وتكىم كەلەدى. ويتكەنى، ولار اپاتتان كەيىن 1,5 ايعا تولمايتىن ۋاقىتتىڭ ىشىندە اتالعان الدىن الا ەسەپتى اياقتاۋعا مۇمكىندىك بەردى. مەن ءسىزدى تەرگەۋدىڭ بارلىق پروتسەسى بارىسىندا حالىقارالىق ازاماتتىق اۆياتسيا تۋرالى كونۆەنتسيانى تولىقتاي ساقتاۋدى قامتاماسىز ەتۋدى جالعاستىرۋعا شاقىرامىن، - دەدى نيكوليا راللو.

ايتا كەتەيىك، 25-جەلتوقساندا اقتاۋ ماڭىندا باكۋدەن گروزنىيعا باعىت العان AZAL جولاۋشىلار ۇشاعى اپاتقا ۇشىرادى.

بورتتا 67 ادام، ونىڭ ىشىندە بەس ەكيپاج مۇشەسى بولعان. اپات سالدارىنان 38 جولاۋشى قازا تاۋىپ، 29 ادام امان قالدى.

تاياۋدا اقتاۋ ماڭىنداعى ۇشاق اپاتى بويىنشا تەرگەۋدىڭ ەسەبى جاريالاندى.

كۇنى كەشە اقتاۋداعى ۇشاق اپاتىنان كەيىن كولىك وقيعالارىن تەرگەۋ جونىندەگى ارنايى ورتالىق قۇرىلاتىنى بەلگىلى بولدى.

سونىمەن قوسا ۇشاق اپاتىنىڭ سەبەبى جىل سوڭىنا دەيىن انىقتالاتىنى ايتىلدى.