وزبەكستاندا قازاقستاندىق كاپيتالمەن جۇمىس ىستەيتىن كومپانيالار قاتارى كوبەيدى

تاشكەنت. KAZINFORM - جارتى جىل ىشىندە وزبەكستاندا شەتەلدىك كاپيتالمەن جۇمىس ىستەيتىن 1800 دەن استام جاڭا كاسىپورىن قۇرىلدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ۇلتتىق ستاتيستيكا كوميتەتىنىڭ 1-شىلدەدەگى دەرەگىنە ساي، وزبەكستاندا شەتەلدىك كاپيتالمەن 16685 كومپانيا جۇمىس ىستەپ تۇر.

بۇل رەتتە قىتايلىق كاسىپورىنداردىڭ ۇلەسى باسىم. 6 ايدا ولاردىڭ قاتارى 835 گە كوبەيىپ، جالپى سانى 4192 گە جەتتى.

ودان كەيىن 3098 كومپانيامەن رەسەي تۇر. ۇشتىكتى تۇركيا تۇيىندەيدى. اتالعان ەلدىڭ كاسىپكەرلەرى وزبەكستاندا 2007 كاسىپورىن قۇرعان.

سونىمەن قاتار، قازاقستاندىق ينۆەستورلاردىڭ دا بەلسەندىگىلى بايقالادى. اتاپ ايتقاندا، جارتى جىلدىڭ ىشىندە ءبىزدىڭ ەل وزبەكستاندا 116 كاسىپورىن اشتى. وسىلايشا، قازىر رەسمي تاشكەنتتە قازاقستاندىق كاپيتالمەن جۇمىس ىستەيتىن كومپانيالار سانى 1157 گە تەڭەلدى.

بۇعان دەيىن حابارلاعانىمىزداي، قازاقستان مەن وزبەكستان اراسىندا قوسىمشا 4 ساۋدا ءدالىزى اشىلۋى مۇمكىن. سونداي-اق، تاشكەنتتە قازاقستاننىڭ، استانادا وزبەكستاننىڭ ساۋدا ورتالىعى سالىنۋى ىقتيمال.

بۇعان قوسا، بيىل العاشقى 5 ايدىڭ قورىتىندىسى بويىنشا قازاقستان وزبەكستاننىڭ نەگىزگى ساۋدا سەرىكتەستەرىنىڭ ۇشتىگىندە قالدى. قامتىلىپ وتىرعان كەزەڭدە رەسمي تاشكەنت استانعا 518,8 ميلليون دوللاردىڭ تاۋارىن ەكسپورتتاپ، 1,2 ميلليارد دوللاردان استام سوماعا ءونىم يمپورتتاعان.