وزبەكستاندا 150 قازاق مەكتەبى جۇمىس ىستەپ تۇر
استانا. قازاقپارات - ءبىلىمدى وزار، ءبىلىمسىز توزار دەپ اتام قازاق بەكەر ايتپاعان. وزبەكستاندا بۇگىندە 150 قازاق مەكتەبى جۇمىس ىستەپ تۇر.

ولاردىڭ دەنى بوستاندىق اۋدانىندا ورنالاسقان. ال ءبىلىم وردالارىنىڭ ماتەريالدىق بازاسى جەتكىلىكتى مە؟
جانات ەلشىبەكوۆا 15 جىلدان بەرى ۇستازدىق ەتەدى. باستاۋىش سىنىپ مۇعالىمى ءوزىنىڭ تاجىريبەسىنە سۇيەنىپ، ساباقتى لوگيكالىق ويىن تۇرىندە جەتكىزۋگە تىرىسادى ەكەن. «بۇل وقۋشىنىڭ وقۋدان جالىقپاۋىنا تاپتىرماس ءتاسىل»، - دەيدى ول.
جانات ەلشىبەكوۆا، باستاۋىش سىنىپ مۇعالىمى:
- ءبىرىنشى سىنىپتا، اسىرەسە ەكىنشى سىنىپتا ءبىز تاربيەگە قاتتى ءمان بەرەمىز. بىلىمگە دە، ءبىراق تاربيەگە ەرەكشە قارايمىز. ەڭ الدىمەن بالاعا مەيىرىم كەرەك. ءارتۇرلى تاسىلدەرمەن، كەرەك بولسا الداپ وقىتىپ، سوندا بالا زەرىكپەيدى. مەكتەپكە كەلگىسى كەلەدى.
ءبىز ايالداعان №26 مەكتەپ بىلتىر پايدالانۋعا بەرىلگەن. 150 بالاعا شاقتالعان ءبىلىم ورداسىندا قازىر 450 وقۋشى ەكى اۋسىممەن وقيدى. مەملەكەتپەن بيزنەس بىرىگىپ سالعان ءبىلىم ورداسى اينالاداعى قازاق اۋىلدارى ءۇشىن كوپتەن كۇتكەن قۋانىش بولعان.
ۇلدانا داۋلەتوۆا، قۇرىلىس كومپانياسى ديرەكتورىنىڭ ورىنباسارى:
- بىزدە قازاق-وزبەك بولىپ بولىنبەيدى. اتا-بابالارىمىز وسى جەردە تۋعان. باسشىمىزعا راقمەت. سپورت بويىنشا وتە جاقسى كورسەتكىشتەرىمىز بار. راس، اينالدىرعان 1 جىلدىڭ ىشىندە دزيۋدو مەكتەبىنەن حالىقارالىق دارەجەدە ەكى چەمپيون شىقتى. ولار مىنا زالدا جاتتىعۋ جاسايدى. جاس ورەندەر بولاشاقتا وزبەكستان قۇراماسىنىڭ اتىن شىعارۋعا بارىن سالماق.
وزبەكستاندا قازىر 150 قازاق مەكتەبى جۇمىس ىستەيدى. ونىڭ 100-ءى بوستاندىق اۋدانىندا ورنالاسقان. ءبىلىم وردالارىنىڭ ماتەريالدىق بازاسىن مەملەكەت تولىقتاي قامتاماسىز ەتەدى. وقۋ قۇرالدارى وزبەكستاندا جازىلىپ، باسىلادى. سىرتتاعى اعايىننىڭ اتا-بابا ءداستۇرىن ساقتاپ، ءوز تىلىندە ءبىلىم الۋىنا مەملەكەت قامقورلىق جاساپ وتىر. سەنىمدى سەرىكتەس، ماڭگىلىك كورشىلەس ەلدەر اراسىنداعى دوستىقتىڭ كورىنىسى وسىنداي بولسا كەرەكتى.
24.kz