وزبەكستان پرەزيدەنتىنىڭ ۇلكەن قىزى پرەزيدەنت اكىمشىلىگىنىڭ باسشىسى لاۋازىمىن يەلەندى
تاشكەنت. KAZINFORM - شاۆكات ميرزيەۆتىڭ جارلىعىمەن پرەزيدەنت اكىمشىلىگىنىڭ باسشىسى لاۋازىمى قايتا جاساقتالدى. تيىسىنشە، ەندى وعان بۇرىن مەملەكەت باسشىسىنىڭ كومەكشىسى بولعان سايدا ميرزيەۆا جەتەكشىلىك ەتەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تاعايىنداۋ تۋرالى وزبەكستان باسشىسىنىڭ باسپا ءسوز حاتشىسى شەرزود اسادوۆ ءمالىم ەتتى.
2023 -جىلدىڭ تامىز ايىنان باستاپ سايدا ميرزيەۆا پرەزيدەنتتىڭ كومەكشىسى قىزمەتىن اتقارىپ كەلدى. ال 2022 -جىلدىڭ قاراشا ايىنان باستاپ ول پرەزيدەنت اكىمشىلىگى اتقارۋشى اپپاراتىنىڭ كوممۋنيكاتسيالار جانە اقپاراتتىق ساياسات سەكتورىنىڭ مەڭگەرۋشىسى بولدى.
سايدا ميرزيەيەۆا - 1984-جىلى تۋعان، وزبەك ساياساتكەرى، وزبەكستان پرەزيدەنتى شاۆكات ميرزيەۆتىڭ ۇلكەن قىزى. 2023 -جىلدىڭ تامىزىندا ميرزيەۆا ەل پرەزيدەنتىنىڭ ءبىرىنشى كومەكشىسى بولىپ تاعايىندالىپ، پرەزيدەنت اكىمشىلىگىندە مەملەكەت باسشىسىنان كەيىنگى ەڭ جوعارى لاۋازىمدى يەلەندى. وزبەكستانداعى الەمدىك ەكونوميكا جانە ديپلوماتيا ۋنيۆەرسيتەتىنىڭ تۇلەگى، تاشكەنت مەملەكەتتىك زاڭ ۋنيۆەرسيتەتى، سونداي-اق م. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ماگيسترى، ەكونوميكا عىلىمدارىنىڭ كانديداتى.
توقتالا كەتەيىك، شاۆكات ميرزيەۆ 2023 -جىلدىڭ تامىزىندا وزبەكستان پرەزيدەنتى اكىمشىلىگىنىڭ قۇرىلىمىنا رەفورما جاسادى. كەيىن پرەزيدەنت اكىمشىلىگىنىڭ باسشىسى لاۋازىمى جويىلدى. سايكەسىنشە، پرەزيدەنت كومەكشىلەرىنىڭ قاتارى كوبەيدى.
ەسكە سالايىق، 2022-2023 -جىلدار ارالىعىندا پرەزيدەنت اكىمشىلىگىن ساردور ۋمۋرزاكوۆ باسقاردى.
اۆتور
ءاليحان اسقار
