وزبەكستان جالعان ەمشىلەرمەن كۇرەستى كۇشەيتپەك
تاشكەنت. KAZINFORM - ەندى وزبەكستاندا ليتسەنزياسىز جانە مەديتسينالىق ءبىلىمى جوق ەمشىلەرگە اكىمشىلىك جازا قولدانىلا باستايدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
ءور ولي ماجليسي سەناتىنىڭ باسپا ءسوز قىزمەتىنەن ءمالىم ەتكەندەي، سەناتورلار كوميتەت وتىرىسىندا «وزبەكستاننىڭ كەيبىر زاڭنامالىق اكتىلەرىنە تولىقتىرۋلار مەن وزگەرىستەر ەنگىزۋ تۋرالى» زاڭ جوباسىن تالقىلاپ، كەيبىر ۇسىنىستاردى بەكىتتى.
اتاپ ايتقاندا، ەندى مەديتسينالىق ءبىلىمى مەن ليتسەنزياسى جوق ەمشىلەر ازاماتتاردى دياگنوستيكادان وتكىزسە نەمەسە ەمدەسە، وندا ولار اكىمشىلىك جاۋاپقا تارتىلادى.
سونىمەن قاتار، پايدا تابۋ ماقساتىندا عىلىمي دالەلدەنبەگەن، تەكسەرىلمەگەن حالىقتىق مەديتسينانىڭ ءادىس-تاسىلدەرىن ناسيحاتتاعانى ءۇشىن دە اكىمشىلىك جازا قولدانىلماق.
اۆتور
ءاليحان اسقار
