وڭتۇستىكتەن سولتۇستىككە قونىس اۋدارۋ باعدارلاماسى ناتيجە بەرمەدى - ماۋلەن اشىمبايەۆ

استانا. KAZINFORM - كەيىنگى جىلدارى سولتۇستىك قازاقستان، پاۆلودار جانە قوستاناي وبلىستارىندا حالىق سانى ازايدى. بۇل تۋرالى سەناتتا دەموگرافيالىق ءوسۋ تاقىرىبىنا ارنالعان ۇكىمەت ساعاتىندا پالاتا ءتوراعاسى ماۋلەن اشىمبايەۆ ايتتى.

«اۋىلدىق جەرلەردە دەنساۋلىق ساقتاۋ سالاسىن دامىتۋ ماسەلەسى دە وتە ماڭىزدى ەكەنى بەلگىلى. قازىرگى تاڭدا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ءتيىستى جۇمىستار جۇرگىزىلىپ جاتىر. الايدا جەكەلەگەن وڭىرلەردە قاراجاتتىڭ ۋاقىتىلى يگەرىلمەۋ فاكتىلەرى بايقالادى. وسىعان بايلانىستى ۇلتتىق جوباعا، اۋىلدىق اۋماقتاردى دامىتۋ تۇجىرىمداماسىنا جانە وڭىرلىك دامۋدىڭ باسقا دا جوسپارلارىنا ەنگىزىلگەن ءىس-شارالاردىڭ ساپالى جۇزەگە اسىرىلۋىن قامتاماسىز ەتۋ قاجەت. كەيبىر وڭىرلەردە الەۋمەتتىك-دەموگرافيالىق جانە ەكونوميكالىق تەڭگەرىمسىزدىكتىڭ ساقتالۋىن دا سىن-قاتەرلەردىڭ ءبىرى رەتىندە اتاپ وتكەن ءجون. بۇگىندە وڭتۇستىك، باتىس ايماقتاردا جانە مەگاپوليستەردە حالىق سانى ايتارلىقتاي ءوسىپ كەلە جاتىر. ال، سولتۇستىك ايماقتاردا، كەرىسىنشە، ازايۋ ءۇردىسى بايقالدى»، - دەدى م. اشىمبايەۆ.

ونىڭ ايتۋىنشا، كەيىنگى جىلدارى سولتۇستىك قازاقستان، پاۆلودار جانە قوستاناي وبلىستارىندا حالىق سانى ازايعان.

«بۇل رەتتە وڭتۇستىكتەن سولتۇستىككە ەرىكتى تۇردە قونىس اۋدارۋ باعدارلاماسى كۇتىلگەن ناتيجەنى بەرمەگەنىن مويىنداۋىمىز كەرەك. وسى ورايدا قازىر سەناتتا قارالىپ جاتقان كوشى-قون تۋرالى جاڭا زاڭ ەڭبەك رەسۋرستارىنىڭ موبيلدىلىگىن ارتتىرۋ ءۇشىن جاڭا ىنتالاندىرۋ شارالارىن قاراستىرادى دەپ سەنەمىز. سونىمەن قاتار وسى باعىتتا باسقا دا ءىس-شارالاردى جۇزەگە اسىرۋىمىز قاجەت. دەموگرافيالىق جاعدايدى ەسكەرە وتىرىپ، الەۋمەتتىك، ترانسپورتتىق جانە ينجەنەرلىك ينفراقۇرىلىمنىڭ دا ءتيىستى دەڭگەيدە دامۋىن قامتاماسىز ەتۋ كەرەك. مۇنامەن قوسا، ازاماتتارىمىزدىڭ جان-جاقتى دامۋى ءۇشىن ساپالى، ەكولوگيالىق ورتا قالىپتاستىرۋ دا ماڭىزدى ءىس. قازىرگى كەزدە ەلىمىزدىڭ دەموگرافيالىق دامۋىنا بايلانىستى وسىنداي ماسەلەلەر بويىنشا ءتيىمدى ۆەدومستۆوارالىق ءىس-قيمىلدى ارتتىرۋ قاجەت»، - دەدى سەنات ءتوراعاسى.