وڭتۇستىك كورەيانىڭ 14 مەرگەنى دۇنيەجۇزىلىك كوشپەندىلەر ويىندارىنا قاتىسىپ جاتىر
استانا. KAZINFORM - ەلوردادا ءوتىپ جاتقان دۇنيەجۇزىلىك كوشپەندىلەر ويىندارىنا وڭتۇستىك كورەيانىڭ 14 مەرگەن كەلدى. كارىستەر ساداق اتۋدان پاريج وليمپياداسىنداعى جەتىستىگىن قايتالاي الا ما، ەلدەگى ساداق اتۋ سپورتى قانشالىقتى ماڭىزدى؟
بۇل تۋرالى وڭتۇستىك كورەيانىڭ ۇلتتىق ساداق اتۋ بىرلەستىگىنىڭ اعا مەنەدجەرى كيم حيەن سۋ ايتىپ بەردى.
«ەڭ الدىمەن دۇنيەجۇزىلىك كوشپەندىلەر ويىنىنا ەكىنشى رەت قاتىسىپ وتىرعانىمىزعا وتە ريزامىز. ويىنداردىڭ اشىلۋ سالتاناتىن دا تاماشالادىق جانە وتە جوعارعى دەڭگەيدەگى ءىس-شارا دەپ باعالادىق. سوسىن قازاقستانعا كەڭەس وداعى زامانىندا كوپتەگەن كارىستەردىڭ قونىس اۋدارعانىن ءبىلىپ وتىرمىن. سول ءۇشىن قازاق پەن كارىس بىرگە تۇرىپ جاتقان ەل بولعاندىقتان، مۇندا ساپارلاپ كەلگەنىمىزگە وتە قۋانىشتىمىن. ءداستۇرلى ساداق اتۋ جاعىنان كارىستەر الدەقايدا مىقتىراق. پاريج وليمپياداسىنا بارعان سپورتشىلار دا ءبىرىنشى ءداستۇرلى ساداقپەن اتۋدى ۇيرەنىپ، سودان كەيىن ەۋروپالىق ساداقتى ۇيرەنگەن. كوشپەندىلەر ويىندارى مەن وليمپيادانىڭ باعىتتارى ءارتۇرلى بولعاندىقتان، استاناعا باسقا مەرگەندەرىمىزدى الىپ كەلدىك»، - دەيدى كيم حيەن سۋ اگەنتتىك تىلشىسىنە بەرگەن سۇحباتىندا.
كورەيالىق قوناق ءوز ەلىندە ساداقتىڭ ەڭ كەمى 7 مىڭ جىلدىق تاريحى بار ەكەنىن جەتكىزدى.
«كورەيانىڭ ۋلسان قالاسىندا ەجەلگى ءبىر ۇڭگىردەن ساداقپەن كيت اتىپ جاتقان سۋرەت تابىلعان. بۇل سۋرەت شامامەن 7 مىڭ جىل بۇرىن سالىنعان دەپ جاتىر. كارىستەردىڭ ساداعى باسقالاردان كىشىرەك، ىڭعايلى، سوندىقتان دا ەلىمىزدە بۇل سپورت كەڭىنەن تاراعان. ەلىمىزدە 400-گە جۋىق ساداق اتۋ ورتالىقتارى جۇمىس ىستەيدى. وندا كەز كەلگەن ادام ساداقتىڭ جاسالۋ جولىمەن تانىسىپ، تەگىن جاتتىعا الادى. كەي مەكتەپتەردە جاسوسپىرىمدەرگە ارنالعان ساداق اتۋ ساباقتارى وتكىزىلەدى»، - دەدى سپيكەر.
ونىڭ ايتۋىنشا، كەلەسى جىلى وڭتۇستىك كورەيادا ساداق اتۋدان حالىقارالىق جارىس وتەدى.
«نەگىزى بۇل ءىس- شارا 19 جىل بۇرىن باستالىپ، 9 رەت وتكىزىلدى جانە 10 جىل بويى توقتاپ تۇردى. سونى قايتادان جانداندىرۋدى ويلاستىرىپ وتىرمىز. بۇل ۇلتتىق ساداققا بايلانىستى ويىندار بولادى. الەمنىڭ تۇپكىر-تۇپكىرىنەن سپورتشىلاردى شاقىرىپ، ءار ەل ءوزىنىڭ ساداق اتۋ ونەرىن كورسەتىپ، جارىس وتكىزەتىن ويىندار جوسپارلانىپ وتىر»، - دەيدى كيم حيەن سۋ.
ايتا كەتەيىك، كەشە ءداستۇرلى ساداق اتۋدان پۋتا نىساناسىن كوزدەۋدە قازاقستاندىق سپورتشىلار ءبىر التىن، ەكى قولا مەدال جەڭىپ الدى.
بۇگىن قالقان نىساناسىن كوزدەۋدە قازاقستاندىق، ماجارستاندىق، ءۇندىستاندىق، رەسەيلىك جانە قىرعىزستاندىق سپورتشىلار فينالعا شىقتى.
جالپى كوماندالىق جارىستار 12 -قىركۇيەك كۇنى وتەدى.
اۆتور
ايجان سەرىكجان قىزى
