وڭتۇستىك كورەياداعى نارازىلىق اكسياسىنا مەديتسينا پروفەسسورلارى قوسىلدى

استانا. قازاقپارات - 20-اقپاننان بەرى وڭتۇستىك كورەياداعى تاجىريبەدەن ءوتۋشى دارىگەرلەردىڭ %90- دان استامى ۇكىمەتتىڭ مەديتسينالىق وقۋ ورىندارىنا قابىلداۋدى ۇلعايتۋ تۋرالى شەشىمىنە نارازىلىق ءبىلدىردى.

مەديتسينا پروفەسسورلارى دا جالعاسىپ جاتقان ەرەۋىلگە قولداۋ ءبىلدىرىپ، جۇمىستان كەتۋ تۋرالى ءوتىنىش بەرىپ، جۇمىس ۋاقىتىن قىسقارتا باستادى، دەپ جازادى Yonhap.

ەلدەگى 13 مىڭ ستاجەر- دارىگەردىڭ %90- دان استامى ۇكىمەتتىڭ مەديتسينالىق وقۋ ورىندارىنا قابىلداۋ كۆوتاسىن 2000 ورىنعا ۇلعايتۋ تۋرالى شەشىمىنە نارازىلىق ءبىلدىرىپ، جاپپاي جۇمىستان كەتىپ جاتىر.

ءىرى ۋنيۆەرسيتەتتىك اۋرۋحانالاردىڭ اعا دارىگەرلەرى - مەديتسينا پروفەسسورلارى دا وسى اپتاداعى جۇمىسىن اياقتاپ، جاپپاي وتستاۆكاعا كەتۋدە.

ۇكىمەت دارىگەرلەردىڭ جەتىسپەۋشىلىگىنە بايلانىستى، اسىرەسە اۋىلدىق جەرلەردە جانە قاۋىپتى حيرۋرگيا، پەدياتريا، اكۋشەرلىك جانە جەدەل مەديتسينالىق كومەك سياقتى ماڭىزدى سالالاردا دارىگەرلەردىڭ جەتىسپەۋشىلىگىنە بايلانىستى مەديتسينا ماماندارىنىڭ سانىن كوبەيتۋگە تىرىسىپ جاتىر.

دارىگەرلەر بۇل وزگەرىس مەديتسينالىق ءبىلىمنىڭ ساپاسىنا نۇقسان كەلتىرىپ، پاتسيەنتتەر ءۇشىن مەديتسينالىق شىعىنداردىڭ جوعارىلاۋىنا اكەلەدى دەگەندى العا تارتادى.

اۆتور

ەركەجان سماعۇلوۆا