وڭتۇستىك كورەيادا جول اپاتىنان قازاقستاننىڭ 4 ازاماتى مەرت بولدى

استانا. KAZINFORM - وڭتۇستىك كورەيانىڭ سوحەان اۆتوماگيسترالىندە قازاقستاننىڭ 4 ازاماتى مىنگەن كولىك جاردان قۇلاپ، سالوندا بولعان بارلىعى مەرت بولدى.

بۇل جايىندا Korea JoongAng Daily باسىلىمى حابارلايدى.

وڭتۇستىك كورەيلىك باسىلىمنىڭ جازۋىنشا، 4 ادام وتىرعان Mercedes-Benz كولىگى جەرگىلىكتى ۋاقىت بويىنشا شامامەن 00:30-دا كەنگيدو ولكەسىنىڭ حۆاسون قالاسىندا جولدىڭ وڭ جاق بەتىندەگى قورشاۋعا سوعىلعان. سودان كەيىن كولىك بىرنەشە مەتر تومەن قۇلاپ، ورتەنگەن.

جول-كولىك وقيعاسى تۋرالى حابار الىسىمەن ءورت سوندىرۋشىلەر سول جەرگە شۇعىل اتتانعان. ولار اپاتتان كەيىنگى 30 مينۋتتىڭ ىشىندە ءورتتى سوندىرگەن. قيراعان كولىكتەن 4 ادامنىڭ ءمايىتى تابىلعان.

مەرت بولعانداردىڭ اتى-ءجونى ازىرگە بەلگىسىز. پوليتسيا اپاتتىڭ ناقتى نەدەن بولعانىن انىقتاپ جاتىر.

Kazinform رەداكسياسى ەلىمىزدىڭ سىرتقى ىستەر مينيسترلىگىنەن وسى وقيعاعا بايلانىستى مالىمەت سۇراتتى.

وسىعان دەيىن وڭتۇستىك كورەيادا ءۇش وڭىردەگى ورمان ورتىنە بايلانىستى توتەنشە جاعداي ەنگىزىلگەنى تۋرالى حابارلادىق.

اۆتور

مارلان جيەمباي